GƏNC NƏSİL ŞƏHİDLƏRİN QƏHRƏMANLIĞINI UNUTMAYACAQ

AZƏRTAC xəbər verir ki, yanvarın 19-da Lətif Kərimov adına Azərbaycan Xalçası və Xalq Tətbiqi Sənəti Dövlət Muzeyində Yasamal rayonunun 18 və 31 nömrəli orta məktəb şagirdlərinin ifasında 20 Yanvar faciəsinin 17-ci ildönümü ilə bağlı ədəbi-bədii kompozisiya göstərilmişdir.
Muzeyin kiçik elmi işçisi Ülkər Şirəliyeva bildirmişdir ki, XX əsrdə totalitarizmin həyata keçirdiyi ən qanlı terror aktlarından biri olan 20 Yanvar qırğını Azərbaycan xalqına, ümumiyyətlə, humanizmə və insanlığa qarşı yönəldilmiş dəhşətli cinayətdir. Həmin gecə sovet rejiminin hərbi, siyasi və mənəvi təcavüzünə məruz qalmış xalqımız öz tarixi qəhrəmanlıq ənənələrinə sadiq olduğunu bütün dünyaya bir daha nümayiş etdirmişdir. Qanlı yanvarda canlarından keçmiş Vətən övladları xalqımızın qəhrəmanlıq salnaməsinə parlaq səhifə yazmışlar.
Ü.Şirəliyeva xalqımıza qarşı törədilmiş ağır cinayətin səbəblərinin araşdırılması, ona siyasi-hüquqi qiymət verilməsi, cinayətkarların adlarının açıqlanması sahəsində ümummilli lider Heydər Əliyevin xidmətlərini xüsusi vurğulamışdır.
Şagirdlərin ifasında 20 Yanvar faciəsinə, xalqımızın azadlığı, xoşbəxt gələcəyi uğrunda canlarını qurban vermiş qəhrəman oğulların və ulu öndər Heydər Əliyevin əziz xatirəsinə, Vətənə həsr olunmuş şeirlər səslənmişdir.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.