RƏSMİ XRONİKA
GENİŞ TƏRKİBDƏ RUSİYA-AZƏRBAYCAN DANIŞIQLARI
Yanvarın 25-də, Azərbaycan Respublikasının Prezidenti Heydər Əliyevin və Rusiya Federasiyasının Prezidenti Vladimir Putinin təkbətək görüşü başa çatdıqdan sonra, Kremlin Yekatirina salonunda iki ölkənin nümayəndə heyətlərinin iştirakı ilə Rusiya-Azərbaycan danışıqları başlanmışdır. Danışıqlarda nümayəndə heyətlərinə Rusiya Federasiyasının Prezidenti Vladimir Putin və Azərbaycan Respublikasının Prezidenti Heydər Əliyev başçılıq edirdilər.
Rusiya Federasiyasının Prezidenti VLADİMİR PUTİN Azərbaycan nümayəndə heyətinin üzvlərini salamlayaraq dedi:
- Hörmətli Heydər Əliyeviç!
Hörmətli Azərbaycanlı həmkarlarımız, dostlar!
Biz Rusiyanın paytaxtında Sizi bir daha ürəkdən salamlayırıq. Dəvətimizi qəbul etdiyinizə və buraya, Rusiyaya belə geniş, mötəbər heyətdə gəldiyinizə görə bir daha Sizə öz minnətdarlığımızı bildiririk.
Dünən biz Azərbaycan Prezidenti ilə ikitərəfli münasibətlərə dair əsas məsələləri ətraflı müzakirə etdik və indi məhdud tərkibdə müzakirələri davam etdirdik. Zənnimcə, bu gün heç kim şübhə etmir ki, Rusiya-Azərbaycan əlaqələrinin inkişafı üçün təməli 2001-ci ilin əvvəlində Bakıda qoyulmuş əhval-ruhiyyə ikitərəfli qarşılıqlı əlaqələrin inkişafı və dərinləşməsinə əlverişli şərait yaratmışdır. Biz iqtisadi sahədə, siyasi, hərbi sahələrdə əməkdaşlıq barədə fikir mübadiləsi etdik. Elə sahələr vardır ki, biz hələ onlara toxunmamışıq. İndi geniş heyətdə bu problemlərin müzakirəsinə qayıdaraq, mən öz çıxışımda humanitar sahələrdə ardıcıl əməkdaşlığa, rus dilinin dəstəklənməsinə, mədəni əlaqələrin inkişafına görə Azərbaycan rəhbərliyinə və Azərbaycan Prezidentinə xüsusi təşəkkürümü bildirmək istərdim. Bu baxımdan Bakıda Aleksandr Sergeyeviç Puşkinin abidəsinin açılışı, əlbəttə ki, xüsusi yer tutur. Heydər Əliyeviç, Sizə deməliyəm ki, Rusiya tərəfi olaraq biz də bu məsələyə kifayət qədər diqqət yetiririk. Azərbaycan mədəniyyəti günləri barədə Sizin xəbəriniz vardır, indicə Sankt-Peterburqdan mənə məlumat verdilər ki, orada Nizaminin abidəsinin açılışına hazırlıq işləri başa çatdırılmışdır.
Ümumiyyətlə mənə elə gəlir ki, əgər biz nəzərdə tutduqlarımızın hamısını beləcə təkidlə həyata keçirsək, şübhəsiz, elə bir vəziyyətə nail olacağıq ki, Azərbaycan xalqı da əməkdaşlığımızın nəticələrini hiss edəcək, Rusiyada da bu nəzərə çarpacaqdır. Sizə bir daha “Xoş gəlmisiniz!” deyirəm.
Sonra Azərbaycan Prezidenti HEYDƏR ƏLİYEV çıxış edərək demişdir:
Sağ olun, Vladimr Vladimiroviç. Mən ilk növbədə dəvətinizə, səmimi qarşılandığımıza və qonaqpərvərliyə görə Sizə təşəkkür etmək istəyirəm. Dünən biz Sizin evinizdə, dediyiniz kimi, əsas məsələlərə dair ətraflı fikir mübadiləsi etdik. Mən bu söhbətdən çox məmnunam, çünki dünən biz Sizinlə Rusiya ilə Azərbaycan arasında qarşılıqlı münasibətlərə dair mühüm məsələləri müzakirə etdik və bu gün təkbətək görüşdə də bunlardan danışdıq. Mən də belə hesab edirəm ki, bir il bundan əvvəl, Vladimr Vladimiroviç, Sizin Azərbaycana rəsmi səfərinizdən sonra Rusiya-Azərbaycan qarşılıqlı əlaqələrində yeni mərhələ başlanmışdır. Məmnuniyyətlə deyə bilərəm ki, bu bir il çox səmərəli il oldu. Biz münasibətlərimizi intensivləşdirə, eyni zamanda konkret məzmunla dolğunlaşdıra və hətta nəticələr də əldə edə bildik. Ona görə də bugünkü görüşümüz və imzalanmağa hazırlanmış sənədlər bir il bundan əvvəl Azərbaycana səfərinizin məhz əməli nəticələrindən və bu bir il ərzində görə bildiyimiz böyük işlərdən xəbər verir.
Rus dilinə bizim diqqət yetirməyimiz və s. barədə Sizin dediklərinizə gəldikdə, bu, prinsipcə ölkəmizdə adi haldır, çünki biz bunu norma hesab edirik və belə də olmalıdır. Biz bu xətti gələcəkdə də davam etdirəcəyik və əslində, bu məsələdə heç bir dəyişiklik olmayacaqdır.
Puşkinin abidəsini biz, əlbəttə ki, onun yaradıcılığına dərin ehtiram hissi ilə açdıq...
VLADİMR PUTİN: Heydər Əliyeviç, Azərbaycanda rus dilində hamı Prezident kimi danışa bilsə, hamı ancaq xoşbəxt olacaqdır.
HEYDƏR ƏLİYEV: Biz bu abidəni Puşkinə böyük məhəbbət hissi ilə açdıq, axı bizim hamımız onun əsərlərini oxuya-oxuya böyümüşük, Puşkini əzbərdən bilirik. Necə olub ki, indiyədək bu abidə qoyulmayıbdır. Bu, diqqətsizlik olub, lakin biz bu nöqsanı aradan qaldırdıq. Mən minnətdaram ki, burada, Moskvada tez-tez Azərbaycan mədəniyyət günləri keçirilir, müxtəlif sərgilər açılır. Lakin Azərbaycanda da həm Rusiya mədəniyyət günləri, həm də Moskva mədəniyyət günləri keçirilir. Bundan əlavə, ümumiyyətlə, respublikamıza Rusiyanın mədəniyyət xadimləri doğma, yaxın adamlar kimi tez-tez gəlirlər. Bizimkilər də buraya tez-tez gəlirlər. Bütün bunlar tamamilə təbiidir və mən belə hesab edirəm ki, münasibətlərimizin möhkəmlənməsi və inkişafı üçün mühüm amillərdir.
Mən çox minnətdaram ki, Siz bizim görüşlərimizə, mənim səfərimə belə böyük diqqət yetirirsiniz. Şübhəsiz, mən yaxşı başa düşürəm ki, bu, Azərbaycana, Rusiya-Azərbaycan əlaqələrinə münasibətinizin təzahürüdür və əmin ola bilərsiniz ki, Azərbaycan Prezidenti kimi mən də, hökumətimiz də, dövlətimiz də eyni hissləri keçiririk.
Danışıqlarda Rusiya tərəfdən xarici işlər naziri İqor İvanov, Təhlükəsizlik Şurasının katibi Vladimir Ruşaylo, Rusiya hökuməti sədrinin müavini Viktor Xristenko, Rusiyanın Bakıdakı səfiri Nikolay Ryabov, Azərbaycan tərəfdən baş nazirin birinci müavini Abbas Abbasov, xarici işlər naziri Vilayət Quliyev, müdafiə naziri Səfər Əbiyev, iqtisadi inkişaf naziri Fərhad Əliyev, Milli Elmlər Akademiyasının prezidenti Mahmud Kərimov və digər rəsmi şəxslər iştirak edirdilər.