SİYASƏT
GÜRCÜSTAN PARLAMENTİ SƏDRİNİN AZƏRBAYCANA RƏSMİ SƏFƏRİ
GÜRCÜSTAN SƏFİRLİYİNDƏ GÖRÜŞ
Yanvarın 29-da Gürcüstan Parlamentinin sədri xanım Nino Burcanadze Azərbaycan Respublikasına rəsmi səfəri çərçivəsində öz ölkəsinin Bakıdakı səfirliyində olmuşdur. O, əvvəlcə Gürcüstan səfirliyi binasının damından Azərbaycan paytaxtının mənzərəsini seyr etdi. Sonra xnım Burcanadze Gürcüstanın Bakıdakı səfirliyinin yeni binası ilə tanış oldu, əməkdaşlarla görüşdü.
Görüşdə Milli Məclis sədrinin müavini Ziyafət Əsgərov, Gürcüstanın Bakıdakı səfiri Zurab Qumberidze, Azərbaycanın Tbilisidəki səfiri Hacan Hacıyev, Gürcüstan parlamentinin azərbaycanlı deputatları Hidayət Hüseynov, Zümrüd Qurbanov, Ramiz Bəkirov, Azər Süleymanov, Bakıdakı “İberiya” ictimai təşkilatının sədri Rafael Qvaladze və başqaları da iştirak edirdilər.
X X X
NAZİRLƏR KABİNETİNDƏ QƏBUL
Həmin gün baş nazir Artur Rasizadə ölkəmizdə rəsmi səfərdə olan Gürcüstan parlamentinin sədri Nino Burcanadzeni və onu müşayiət edən şəxsləri qəbul etmişdir.
Artur Rasizadə qonaqları salamlayaraq dedi ki, ölkələrimiz arasında olan dostluq münasibətləri Azərbaycan və Gürcüstan dövlət müstəqilliyi qazandıqdan sonra strateji tərəfdaşlığa çevrilmişdir. Baş nazir bildirdi ki, beynəlxalq siyasətin bir çox məsələlərində hər iki dövlətin mövqeyi üst-üstə düşür. O, iqtisadi əlaqələrin inkişafından danışaraq vurğuladı ki, TRASEKA, Bakı-Tbilisi-Ceyhan neft kəmərinin, Bakı-Tbilisi-Ərzurum qaz kəmərinin tikintisi kimi regional layihələrdə əməkdaşlıq tərəflərin bu sahələrdə fəal işlədiyini deməyə əsas verir.
Lakin Azərbaycanın da, Gürcüstanın da ümumi problemi – separatizmlə mübarizə problemi var. Ermənistanın təcavüzü nəticəsində Azərbaycan torpaqlarının 20 faizi işğal altındadır, bir milyon vətəndaşımız qaçqın-köçkün vəziyyətindədir. Abxaziya münaqişəsi üzündən Gürcüstanda da 300 minə yaxın qaçqın var.
Gürcüstan parlamentinin sədri səmimi qəbula görə təşəkkür edərək dedi ki, onun ölkəsi Azərbaycanla dostluq münasibətlərinin inkişafına və möhkəmlənməsinə böyük əhəmiyyət verir. Azərbaycan rəhbərliyinin mövqeyi Gürcüstana bir çox regional iqtisadi layihələrin həyata keçirilməsində iştirak etmək imkanı vermişdir. Nino Burcanadze Cənubi Qafqazda regional münaqişələrə tezliklə son qoyulmasının zəruriliyindən danışaraq vurğuladı ki, bu bölgədə sabitliyin yaranması xeyli dərəcədə Abxaziya və Dağlıq Qarabağ münaqişələrinin həllindən asılıdır.
Qəbulda Milli Məclis sədrinin müavini Ziyafət Əsgərov, Azərbaycanın Tbilisidəki səfiri Hacan Hacıyev, Gürcüstanın Bakıdakı səfiri Zurab Qumberidze, digər rəsmi şəxslər iştirak edirdilər.
X X X
GÜRCÜSTAN VƏ AZƏRBAYCAN PARLAMENTLƏRİNİN SƏDRLƏRİ BİRGƏ BƏYANAT İMZALAMIŞLAR
Yanvarın 29-da “Respublika” mehmanxanasında, Prezident Heydər Əliyev Gürcüstan nümayəndə heyətini qəbul etdikdən sonra, Gürcüstan və Azərbaycan parlamentlərinin sədrləri Gürcüstan parlamentinin başçısı xanım Nino Burcanadzenin ölkəmizə rəsmi səfərinin yekunlarına dair birgə bəyanat imzalamışlar.
Bəyanat imzalandıqdan sonra Milli Məclisin sədri Murtuz Ələsgərov və Gürcüstan parlamentinin sədri Nino Burcanadze jurnalistlərin suallarına cavab verdilər. Hər iki sədr bildirdi ki, bəyanatda ölkələrimizin parlamentlərinin qarşılıqlı əlaqələrini daha yüksək, keyfiyyətcə yeni səviyyəyə qaldırmağın zəruriliyi xüsusi vurğulanmışdır.
Birgə bəyanatın tam mətni mətbuatda dərc olunacaqdır.
X X X
SƏFƏR BAŞA ÇATDI
Yanvarın 29-da Gürcüstan parlamentinin sədri Nino Burcanadzenin ölkəmizə iki günlük rəsmi səfəri başa çatdı.
İki ölkənin dövlət bayraqları ilə bəzədilmiş dəmir yolu vağzalında Nino Burcanadzeni və onu müşayiət edən şəxsləri Milli Məclisin sədri Murtuz Ələsgərov, parlament sədrinin müavini Ziyafət Əsgərov, Milli Məclis Aparatının rəhbəri Səfa Mirzəyev, Azərbaycanın Tbilisidəki səfiri Hacan Hacıyev, Gürcüstanın Bakıdakı səfiri Zurab Qumberidze və digər rəsmi şəxslər yola saldılar.
Nino Burcanadze yola düşməzdən əvvəl jurnalistlərin suallarına cavab verərək, ölkəmizin rəhbərləi ilə keçirdiyi görüşlərin nəticələrini yüksək qiymətləndirdi, Gürcüstan hökumətinin qarşılıqlı surətdə faydalı münasibətləri bundan sonra da inkişaf etdirməyə hazır olduğunu bildirdi.