REGİONLAR
Gədəbəy rayonunda ümumi məhsul istehsalının həcmində 11 faiz artım qeydə alınıb
Gədəbəy, 7 fevral, Rauf Hacıyev, AZƏRTAC
Son illər Azərbaycanın bütün bölgələri kimi, ucqar dağ rayonu olan Gədəbəyin də uğurlu inkişafı təmin edilib. Prezident İlham Əliyevin ötən il avqustun 4-də Gədəbəyə səfəri zamanı rayonda Heydər Əliyev Mərkəzinin, Bayraq meydanının açılışı olub. Dövlətimizin başçısı həmçinin “Gədəbəy Mineral Suları” MMC-nin limonad istehsalı müəssisəsinin, “Azərişıq” ASC-nin 110/35/10 kilovotluq Gədəbəy Elektrik Yarımstansiyasının və Gədəbəy şəhərinin içməli su təchizatı layihəsinin açılışında iştirak edib.
AZƏRTAC-ın bölgə müxbiri xəbər verir ki, bu barədə Gədəbəy rayonunda 2017-ci ilin sosial-iqtisadi inkişafının yekunları və 2018-ci ildə qarşıda duran vəzifələrə dair keçirilən hesabat yığıncağında danışılıb.
Rayon icra hakimiyyətinin başçısı Ramiz Yediyarovun məruzəsində qeyd olunub ki, 2017-ci ildə Gədəbəydə ümumi məhsul istehsalının həcmi 11 faiz artmaqla, 494751 min manata çatıb. Ümumi məhsul istehsalında sənaye məhsullarının dəyəri 132124 min manat, kənd təsərrüfatı məhsulları 136732 min manat, ticarət 205779 min manat, tikinti, nəqliyyat, rabitə və digər xidmətlər 20116 min manat olub. Rayon üzrə iqtisadiyyatın müxtəlif sahələrinə 25 683,5 min manat yerli, 272 min manat xarici olmaqla, ümumilikdə, 25 955,5 min manat investisiya cəlb edilib və bu investisiyalar hesabına 482 yeni iş yeri yaradılıb.
Bildirilib ki, rayon iqtisadiyyatının əsasını əkinçilik və heyvandarlıq təşkil etdiyi üçün bu sahənin daha da inkişaf etdirilməsi istiqamətində işlər aparılaraq məhsul istehsalçılarına lazımi dəstək verilib və müvafiq kömək göstərilib. 2017-ci ildə rayonda 127,2 min ton kartof istehsal olunub ki, bu da 2016-cı illə müqayisədə 18 min ton və ya 16,1 faiz çoxdur. Taxıl istehsalı 3319 ton, arpa 209 ton, qarğıdalı 197 ton, tərəvəz 4189 ton, o cümlədən kələm istehsalı 3654 ton olub. Orta məhsuldarlıq hər hektara kartof üzrə 106, buğda üzrə 27, arpa üzrə 20 sentner təşkil edib.
Rayon üzrə iribuynuzlu mal-qaranın sayı 49 min 798 baş, qoyun-keçilərin sayı isə 255 min 552 baş təşkil edib. Həmçinin diri çəkidə 6,1 min ton ət və 42,8 min litr süd istehsal olunub. Hazırda rayonda 1006 nəfər kənd sakini fərdi təsərrüfatında 8009 arı ailəsi saxlayır. Hesabat ilində rayon üzrə 48 ton bal əldə edilib. Bu da 2016-cı illə müqayisədə 1 ton çoxdur.
Məruzədə diqqətə çatdırılıb ki, 2017-ci ildə rayonda 2282 hektar əkin sahəsinin becərilməsi üçün kənd təsərrüfatı məhsulları istehsalçılarına yanacaq və motor yağları alınmasına görə dövlət büdcəsinin vəsaiti hesabına 148,3 min manat subsidiya verilib, 249 istehsalçıya 139 ton mineral gübrə 70 faiz güzəştli qiymətlərlə satılıb. Heyvandarlığın cins tərkibinin yaxşılaşdırılması məqsədilə aparılan süni mayalama nəticəsində əldə edilmiş 66 baş buzova görə fermerlərə 6,6 min manat subsidiya ödənilib. Eyni zamanda, əkilməyən pay torpaq sahələrinin əkin dövriyyəsinə cəlb edilməsi məqsədilə aparılan maarifləndirmə işləri nəticəsində Düzyurd kəndində 60 hektar, Kiçik Qaramurad və Parakənd kəndlərində 200 hektar olmaqla, 260 hektar torpağın əkilməsi təmin edilib.
Əhalinin keyfiyyətli rabitə xidməti ilə təmin edilməsi istiqamətində aparılan işlərə uyğun olaraq Çobankənd və Göyəlli kənd poçt şöbələri yenidən tikilərək istifadəyə verilib, internet xidməti daha da genişləndirilib.
Kəndlərdə infrastrukturun yenilənməsi və bərpası istiqamətində görülən işlərə uyğun olaraq İkinci Kənd İnvestisiya Layihəsi çərçivəsində rayonun beş kəndində uzunluğu 37 kilometr olan kənd yolları təmir olunub, beş kənddə abadlaşdırma işləri aparılıb. “Qızıl Aypara” və “Qırmızı Xaç” komitələri ilə aparılan qarşılıqlı işlər nəticəsində rayonun sərhədyanı Mormor, Zamanlı, İsalı, Cücənli, Dördlər, Motudərə, Qasımağalı, Arabaçı və Fərzalı kəndlərində, ümumilikdə, 408 ailəyə 2 ton üzvi, 50 kiloqram azot gübrəsi, 9 ədəd mini kultivator, 1800 litr yanacaq və sürtgü yağı, 39 ailəyə isə birdəfəlik maddi yardım verilib.
Əhalini fasiləsiz elektrik enerjisi ilə təmin etmək məqsədilə görülən işlər çərçivəsində Göyəlli və Mormor kəndlərində istismar müddətini başa vurmuş elektrik dayaqları və naqilləri yeniləri ilə əvəzlənib. Hesabat ilində rayonun Dəyirmandağ kəndində Yaponiyanın ölkəmizdəki səfirliyinin maliyyə dəstəyi ilə yeni tibb məntəqəsi tikilib istifadəyə verilib.
Məruzə və çıxışlarda uğurlarla yanaşı, problemlər də sadalanıb, onların həlli üçün təkliflər irəli sürülüb.