CƏMİYYƏT


Gəlişi payızı bahara, gedişi qışa çevirən şəhid, mövludun mübarək!

Bakı, 12 oktyabr, AZƏRTAC

Bu gün şəhid Nurlan Əhmədlinin cənnətdəki ilk doğum günüdür. Yaşasa idi, 25 yaşı olacaqdı. Lakin Nurlan da minlərlə gənc kimi Vətən uğrunda canını qurban verərək erkən yaşda behiştin ən gözəl guşəsində özünə məkan seçdi. Nurlanın 24 illik ömrü oktyabr ayına sığdı. Oktyabrda dünyaya gəldi, doğumu ilə ailəsinə payızı bahar etdi. Oktyabrda da şəhadətə yüksələrək sevdiklərinə erkən qışı gətirdi. Övlad itkisi ilə ömürlərinə qışın qarı, çovğunu gələn ailəsi onun şərəfli ömrü, qəhrəmanlığı və şəhidlik kimi yüksək mərtəbəyə ucalması ilə fəxr edir.

Əhmədli Nurlan Rəhim oğlu 1996-cı il oktyabrın 12-də Oğuz rayonunun Xaçmaz kəndində anadan olub. 2003-cü ildə M.F.Axundov adına 1 nömrəli tam orta məktəbə daxil olub. 2014-cü ildə həmin məktəbi bitirib. 2014-2018-ci illərdə Azərbaycan Texniki Universitetində Radiotexnika mühəndisliyi fakültəsi üzrə bakalavr təhsili alıb.

Nurlan Əhmədli 2019-cu ilin yanvarında müddətli həqiqi hərbi xidmətə çağırılıb. Hacıqabul rayonunda yerləşən "N" saylı hərbi hissədə xidmət edib. 2020-ci ilin iyulunda isə xidmətini uğurla başa vuraraq Oğuzun Xaçmaz kəndinə dönüb.

Ötən il sentyabrın 27-dən etibarən döyüşlərə qatılan Nurlan Füzuli və Qubadlı rayonları istiqamətlərində gedən hərbi əməliyyatlarda iştirak edib, həmin rayonların alınmasında böyük şücaət göstərib. Bir aya yaxın döyüşlərdə iştirak edən Nurlan oktyabrın 25-dən 26-na keçən gecə Qubadlıda yaxınlığına minaatan mərmisi düşməsi nəticəsində başından xəsarət alaraq şəhadətə yüksəlib. Oktyabrın 27-si Oğuz rayon Xaçmaz kənd Şəhidlər xiyabanında dəfn olunub. Azərbaycan Respublikasının Prezidenti İlham Əliyevin sərəncamları ilə ölümündən sonra "Vətən uğrunda", "Döyüşdə fərqlənməyə görə", "Füzulinin azad olunmasına görə" medalları ilə təltif edilib.

Şəhidin anası Çiçək Əhmədova AZƏRTAC-a övladı haqqında qürurla danışır. Çiçək xanım deyir ki, Nurlan bizim başımızı hər zaman uca edirdi, özü də ən uca zirvəyə yüksəldi. Övladı adətən ata-anaya görə tanıyırlar. Amma Nurlan qısa ömründə elə qəhrəmanlıqlar etdi ki, bizi ona görə tanıyırlar: "Nurlan ailənin ilk övladı idi. Kiçik yaşlarından dəcəl olsa da, qorxmazlığı ilə də həmyaşıdlarından seçilirdi. Çox mehriban, ürəyitəmiz, vətənpərvər övlad idi. Saflığı üzündə əks olunmuşdu, adı kimi nurlu siması vardı. Nurlan orta məktəbdə oxuyanda karate ilə məşğul olsa da, dərslərini heç zaman axsatmırdı. Özünü hərtərəfli formalaşdırmağa çalışırdı. Hərbi xidmət dövründə də cəsarəti və nizam-intizamı ilə seçilirdi. Hərbi xidmətdə olduğu zaman nizam-intizamlı olduğuna, döyüş və ictimai siyasi hazırlıqda əldə etdiyi yüksək nailiyyətlərə görə fəxri fərmanla təltif olunub. Hətta hərbi xidmət zamanı Nurlana təşəkkür məktubu da verilmişdi.

Hərbi xidməti başa vurub evə gələndən 80 gün sonra müharibə başladı. Nurlan da heç tərəddüd etmədən cəbhə xəttinə yollandı. O, Füzuli və Qubadlı rayonlarının alınmasında fədakarlıq göstərib. Oktyabrın 17-də Füzuli düşmən tapdağından xilas edildi. Yadımdadır, Füzuli rayonu işğaldan azad olunanda mənə zəng edib şad xəbər verdi. Necə sevinirdi. Hələ də o səs, o şad xəbər qulağımdadır. Hər il oktyabrın 17-də yenə Nurlanın zəngini gözləyəcəyəm...

Nurlan Füzulidən sonra Qubadlı istiqamətində gedən hərbi əməliyyatlarda da şücaət göstərib. Oğlum Qubadlı rayonunun da azad edilməsi sevincini yaşadı. Lakin bu, onun son sevinci oldu. Oktyabrın 26-da Qubadlıda gedən döyüşlər zamanı şəhid oldu. Övlad itirmək çox ağırdır, amma bir ana kimi Nurlanla fəxr edirəm".

Ç.Əhmədova bildirib ki, dövlət həm maddi, həm də mənəvi cəhətdən ailədən dəstəyini əsirgəməyib. Şəhid anası buna görə hər kəsə təşəkkür edib.

Şəhidimizin atası Rəhim Əhmədov Nurlanla ata-oğul münasibətindən əlavə, aralarında bir dostluq olduğunu da qeyd edib. Ata həm övladını, həm də ən yaxın dostunu Vətən uğrunda qurban vermişdi: "Nurlanın döyüş yoldaşları bizə dedilər ki, "siz oğlunuzla fəxr edin, o, çox qorxmaz, mərd, qoçaq, sözü ilə əməli bir olan, doğrunun tərəfini tutan, haqsızlığı qəbul etməyən oğul idi. Güllələr üstümüzə yağış kimi yağan zaman da Nurlan qorxmazdı, düşməni hədəf alıb atəş açardı. Ən cəsur döyüşçülərdən idi". Nurlan şəhadətə də cəsarətlə irəliləyib. Silahdaşlarından biri bizə oğlumun necə şəhid olduğunu dedi. Mənim üçün çətin olsa da, övladımın son döyüşü haqqında eşitmək istədim. Döyüş yoldaşı həmin səhnəni danışanda isə Nurlanla bir daha fəxr etdim. Silahdaşı deyirdi ki, Qubadlıda şiddətli döyüşlər gedirmiş. Atışma olanda Nurlana "uzanaq, atışma səngiyəndə birtəhər qalxıb davam edərik. O isə məni dinləmədi, yoldaşlarımız güllə altındadır, mən burada özümü düşünə bilmərəm", - deyərək irəli atıldı. Digər döyüş yoldaşlarımızı xilas etməyə çalışarkən yaxınlığına minaatan mərmisi düşməsi nəticəsində şəhid oldu" dedi.

Oğlum ön cəbhədə olanda, mən də arxa cəbhədə əlimdən gələni edirdim. Digər əsgərlər də mənim övladımdır. O zaman xalqımız ön cəbhədə döyüşən hərbçilərə qida, ərzaq, yataq dəsti, isti paltar, corab göndərirdi. Mən də əsgərlərimizə yardım aparırdım. Onlar üçün əlimdən nə gəlir təmənnasız edirdim. Bunu özümə vətəndaşlıq borcu bilirdim. Nurlan kimi neçə qəhrəman oğul ərazi bütövlüyümüz uğrunda döyüşlərdə şəhid oldu. Allah cəmi şəhidlərimizə rəhmət eləsin. Qazilərimizə tezliklə sağalmalarını arzu edirəm. Uca Yaradan xidmətini davam etdirən hərbi qulluqçuları qorusun. Vətən sağ olsun!"

Mövludun və şəhadətin mübarək, Vətən övladı. 30 ildir cadar-cadar olmuş torpaqlara sən öz qanınla həyat bəxş etdin, can verdin. Qədəmini basdığın hər yer güllük-gülüstana çevriləcək. O torpaqlardakı izini nə külək silə biləcək, nə də yağış. Bundan sonra neçə əsr keçsə də, hər gələn nəsil sənin ayaq izlərini görəcək, açdığın cığırla irəliləyəcək, neçə-neçə Nurlanlar yetişəcək...

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.