İQTİSADİYYAT
Gəmiçilik “Xəzərimizi qoruyaq” adlı maarifləndirici tədbir keçirib
Bakı, 2 oktyabr, AZƏRTAC
“Azərbaycan Xəzər Dəniz Gəmiçiliyi” QSC-nin İnsan Resurslarının İdarəedilməsi Departamentinin təşəbbüsü və Keyfiyyət, Sağlamlıq, Əməyin Təhlükəsizliyi və Ətraf Mühitin Mühafizəsi Departamentinin dəstəyi ilə “Xəzərimizi qoruyaq” adlı maarifləndirici tədbir keçirilib.
“Azərbaycan Xəzər Dəniz Gəmiçiliyi” QSC-nin mətbuat katibliyindən AZƏRTAC-a bildirilib ki, gənclərin iştirak etdiyi tədbir “Bibiheybət” Gəmi Təmiri Zavodunun ərazisində təşkil olunub.
Əvvəlcə “Bibiheybət” Gəmi Təmiri Zavodunun Əməyin mühafizəsi, təhlükəsizlik texnikası və ətraf mühitin mühafizəsi şöbəsinin rəisi Salman Zeynalov iştirakçıları tədbir zamanı zavod ərazisində təhlükəsizlik haqqında təlimatlandırıb. Sonra Keyfiyyət, Sağlamlıq, Əməyin Təhlükəsizliyi və Ətraf Mühitin Mühafizəsi Departamentinin ətraf mühitin mühafizəsi üzrə mühəndisi Sabir Kərimzadə “Beynəlxalq Dəniz Günü” və “Xəzər Həftəsi“ ilə bağlı iştirakçıları məlumatlandırıb. Bildirib ki, ətraf mühitin qorunması “Azərbaycan Xəzər Dəniz Gəmiçiliyi” QSC üçün əsas davamlı inkişaf meyarlarından biridir.
Tədbirdə təyinatı liman, reyd və sahilyanı akvatoriyalarda dəniz səthindən neft məhsulları və bərk tullantıları yığmaq olan “Bulvar-1” gəmisinin texniki-istismar imkanları barədə də danışılıb. Gəminin işinin gedişatı əyani nümayiş etdirilib.
Sonra “Bibiheybət” Gəmi Təmiri Zavodunun sahil ərazilərində təmizlik işləri aparılıb, toplanılan zibil çeşidlənərək konteynerlərə yığılıb və ərazidən kənarlaşdırılıb.
Tədbir iştirakçıları gəmiçiliyin müxtəlif strukturlarında çalışan, həmçinin Azərbaycan Dövlət Dəniz Akademiyası və nəzdində olan Azərbaycan Dənizçilik Kollecində təhsil alan gənclər olub. Ümumilikdə tədbirdə 50-ə yaxın əməkdaş iştirak edib. Onlar xüsusi fərdi mühafizə vasitələri ilə təmin olunublar.
Qeyd edək ki, Beynəlxalq Dəniz Günü Birləşmiş Millətlər Təşkilatının qəbul etdiyi qərara əsasən, 1978-ci ildən hər il qeyd olunur. Azərbaycanda sentyabr ayının son həftəsinə (“Xəzər Həftəsi”) təsadüf edən bu əlamətdar gün ictimaiyyətin diqqəti gəmiçiliyə və dənizlərin (o cümlədən, Xəzərin) mühafizəsinə cəlb edilir.