Gəmiçilikdə dezinfeksiya işləri davam etdirilir

Bakı, 16 fevral, AZƏRTAC

“Azərbaycanda yeni koronavirus xəstəliyinin yayılmasının qarşısının alınmasına dair fəaliyyət planı”nın icrası məqsədilə “Azərbaycan Xəzər Dəniz Gəmiçiliyi” QSC (ASCO) profilaktik tədbirləri davam etdirir.

ASCO-dan AZƏRTAC-a bildirilib ki, müəyyənləşdirilmiş qrafikə uyğun olaraq növbəti dezinfeksiya işləri “Akademik Zərifə Əliyeva”, “Cəlil Məmmədquluzadə”, “Cəfər Cabbarlı”, “PS-173”, “PSK-31”, “PSK-40”, “Vasif Hüseynov”, “SOCAR-1”, “Abşeronskaya-6”, “General Əsədov” gəmilərində, eləcə də Pirallahı, Damba və Şimal körpülərinin sahil ərazilərində, yaşayış yerlərində, giriş-çıxış və inzibati ərazilərdə, “Zığ” Gəmi Təmiri və Tikintisi Zavodunun paltardəyişmə otaqlarında və yeməkxanasında aparılıb.

Dezinfeksiya bu sahədə ixtisaslaşmış və müvafiq lisenziyaya malik şirkət tərəfindən həyata keçirilib. Proses ASCO-nun Sosial inkişaf və nəqliyyat şöbəsinin əməkdaşlarının nəzarəti ilə yerinə yetirilib.