MƏDƏNİYYƏT
Gənc rəssam Əfşan Əsədovanın fərdi sərgisi açılıb
Bakı, 21 iyun, Ceyhun Alışlı, AZƏRTAC
İyunun 21-də Azərbaycan Rəssamlar İttifaqının Vəcihə Səmədova adına sərgi salonunda gənc rəssam Əfşan Əsədovanın “Yasəmən” adlı rəsm sərgisi açılıb.
AZƏRTAC xəbər verir ki, sərgi Mədəniyyət və Turizm Nazirliyi və Azərbaycan Rəssamlar İttifaqının birgə təşkilatçılığı ilə baş tutub.
Tədbirdə Azərbaycan Rəssamlar İttifaqının katibi, Xalq Rəssamı Ağəli İbrahimov çıxış edərək sərginin əhəmiyyətindən danışıb.
Qeyd olunub ki, istedadlı fırça ustasının sərgiyə təqdim etdiyi sənət əsərləri əsasən batika, qrafika və moda janrındadır. Həm janr müxtəlifliyi, həm də işlənmə texnikası ilə maraq doğuran sənət əsərləri zəngin dünyagörüşün və gərgin əməyin bəhrəsidir.
Bildirilib ki, sərgidə nümayiş olunan 40-dək sənət əsəri müxtəlif mövzuları əhatə etməklə yanaşı, gənc rəssamın həyata baxışını əhatəli şəkildə tərənnüm etdirə bilib.
Vurğulanıb ki, emosional hisslərin rənglərlə ifadəsi və fəlsəfi yanaşma sənət əsərlərinin əsas mövzularındandır.
Əməkdar İncəsənət Xadimi Ziyadxan Əliyev gənc rəssamın sayca birinci olan fərdi sərgisinin mükəmməlliyindən söz açıb. Rəssamın özünəməxsus sənət dünyasından bəhs edən natiq onun sənətə olan sonsuz sevgisindən danışıb.
Almaniya-Azərbaycan Cəmiyyətinin sədri, kulturoloq Çingiz Abdullayev sərgidə yer alan əsərlərin bənzərsizliyini xüsusi qeyd edib.
Vurğulanıb ki, sözügedən sərgi fırça ustasının tolerant bir ölkənin vətəndaşı kimi humanizm və sülh tərəfdaşı olduğunu bir daha nəzərə çatdırır.
Ə.Əsədova çıxış edərək sərginin təşkilində əməyi olan hər kəsə təşəkkürünü bildirib.
Sonra qonaqlar sərgi ilə tanış olublar.
Sərgi iki gün davam edəcək.