Gəncə, 22 fevral, Rauf Hacıyev, AZƏRTAC

Müasir dövrdə təhsilin paradiqmasının dəyişməsi ilə əlaqədar hazırkı universitetlər elm və təhsil müəssisələri olmaqla yanaşı, həm də yeni innovativ ideyaları dəstəkləyən, onların cəmiyyətə və sənayeyə tətbiqini həyata keçirən, eləcə də elm-təhsil-sənaye üçlü modelinin inkişafına təkan verən böyük intellektual mərkəzlərdir. Son illər Azərbaycanda bütün sahələrdə olduğu kimi elm və təhsildə qazanılan bir çox nailiyyətlər alınmış elmi nəticələrin və irəli sürülən innovativ ideyaların ölkəmizdə biliyə əsaslanan və rəqabətqabiliyyətli iqtisadiyyatın qurulması üçün tətbiqini zəruri edib. Hazırda universitetlərin daha bir funksiyası gənclərin təşəbbüskarlıq meyillərini inkişaf etdirmək, onların innovativ ideyalarına münbit şərait yaratmaq və bu layihələri mənfəət gətirən sahəyə çevirməkdir.

AZƏRTAC-ın bölgə müxbiri xəbər verir ki, bu fikirlər Təhsil Nazirliyinin dəstəyi və Gəncə Dövlət Universitetinin İnnovasiyalar departamentinin təşkilatçılığı ilə həyata keçirilən “Yeni bir fikrim var” təşəbbüskarlıq müsabiqəsinin final mərhələsində səsləndirilib.

Tədbirdə Azərbaycan Milli Elmlər Akademiyasının alimləri, Milli Məclisin deputatları, yerli və xarici iş adamları, eləcə də Gəncə Dövlət Universitetinin alim və gənc tədqiqatçıları iştirak ediblər.

Universitetin rektoru, professor Yusif Yusibov bildirib ki, texnoloji yeniliklər dövründə innovasiya və sahibkarlıq iqtisadi inkişafı sürətləndirən əsas amillərdəndir. Hazırda yüksək tərəqqiyə çatmış ölkələr öz iqtisadiyyatlarının dayanıqlılığını və rəqabətqabiliyyətliliyini təmin etmək üçün innovasiyayönümlü iqtisadiyyatı seçiblər.

Azərbaycanda da bu sahədə bir çox uğurların əldə olunduğunu deyən rektor qeyd edib ki, son illərdə Prezident İlham Əliyev tərəfindən ölkə iqtisadiyyatının neft və qaz amilindən asılılığının azaldılması, eyni zamanda, qeyri-neft sektorunun inkişafı və innovasiyaların tətbiqinə əsaslanan iqtisadiyyatın qurulması istiqamətində mühüm tədbirlər həyata keçirilib, müvafiq tapşırıq və sərəncamlar verilib.

Vurğulanıb ki, ölkə başçısının bu sahədəki çağırışlarına cavab olaraq, eləcə də “Azərbaycan 2020: gələcəyə baxış” İnkişaf Konsepsiyasının, “Azərbaycan gəncliyi 2017-2021-ci illərdə” və “Azərbaycan Respublikası regionlarının 2014-2018-ci illərdə sosial-iqtisadi inkişafı” dövlət proqramlarının icrasına dəstək məqsədilə Gəncə Dövlət Universitetində respublikamızın qərb regionunda ilk dəfə innovasiyalar departamenti fəaliyyətə başlayıb.

“İnnovasiyalar departamentinin əsas məqsədi ali təhsil mühitində təşəbbüskarlıq mədəniyyətini formalaşdırmaq və innovasiyayönümlü sahibkarlığın inkişafı məqsədi ilə biznes inkubatorlarının yaradılmasına şərait yaratmaqdır. Beynəlxalq təcrübə də göstərir ki, innovasiyayönümlü iqtisadiyyatın inkişafını sürətləndirmək üçün ən əlverişli üsullardan biri universitetlərin tərkibində biznes inkubatorlarının və texnoloji parkların yaradılmasıdır”,- deyə Y.Yusibov fikirlərini bölüşüb.

Universitetin elm və innovasiyalar üzrə prorektoru, Milli Məclisin deputatı Pərvin Kərimzadə bildirib ki, innovasiyalar departamentinin təşkilatçılığı ilə həyata keçirilən “Yeni bir fikrim var” təşəbbüskarlıq müsabiqəsi üçün ötən ilin dekabrından müraciətlərin qəbuluna başlanılıb. Müsabiqədə ümumilikdə akademik heyət tərəfindən 43, tələbələrdən isə 62 müraciət qeydə alınıb. Onlardan finala akademik heyət üzrə 5, tələbələr üzrə isə 7 layihə çıxa bilib.

Müsabiqədə həm akademik heyət, həm də tələbələrin layihələrindən finala çıxan ilk üç yerin qalibinin pul mükafatı qazanacağını deyən P.Kərimzadə bildirib ki, layihənin həyata keçirilməsində Türk Hava Yolları, “Bakcell” və “Coca-Cola Bottlers” Ltd şirkətləri, eləcə də yerli iş adamları maliyyə dəstəyi göstəriblər.

Müsabiqə iştirakçıları yeni layihələri əsasında hazırlanmış təqdimatla çıxış ediblər.

Münsiflər heyəti iştirakçıların layihələrini qiymətləndirib, akademik heyət və tələbələr arasından seçilən ilk üç yerin qalibləri mükafatlandırılıblar.

Qeyd edək ki, münsiflər heyətinin çoxballı qiymətləndirməsinə əsasən akademik heyətdən Vaqif Rüstəmovun “Arıları gənələrdən xilas edən qurğu” layihəsi birinci yerə, Cavid Bağırzadənin “Tarixi abidələrin öyrənilməsi və təbliği üzrə turizm şirkətinin yaradılması” layihəsi ikinci yerə, Əbülfət Məhərrəmovun “Meyvə qurudan qurğu” layihəsi isə üçüncü yerə layiq görülüb. Tələbələrdən Sevinc Quliyevanın “Erkən yaşda düzgün ixtisas seçiminin aparılması” layihəsi birinci yerə, türkiyəli Mihrican İnakın “Kaliforniya soxulcanı vasitəsilə gübrə istehsalı” layihəsi ikinci yerə, İlkin Məmmədzadənin “Gəncə şəhərində turizm yerlərini göstərəcək xəritə” layihəsi isə müsabiqədə üçüncü yerə layiq görülüb.