REGİONLAR


Gəncə Dövlət Universitetindəki semestr imtahanlarında 6000-ə yaxın tələbə iştirak edəcək

Gəncə, 8 yanvar, Rauf Hacıyev, AZƏRTAC

Gəncə Dövlət Universitetində (GDU) 2018-2019-cu tədris ilinin payız semestrinin imtahan sessiyası başlayıb.

AZƏRTAC-ın bölgə müxbiri xəbər verir ki, universitetin 6000-ə yaxın tələbəsinin iştirak edəcəyi imtahanlar təhsil naziri Ceyhun Bayramovun “İmtahan sessiyasının təşkili və keçirilməsi barədə” 2018-ci il 11 dekabr tarixli əmrinə əsasən təşkil edilib.

Əmrdə ali və orta ixtisas təhsili müəssisələrində 2018-2019-cu tədris ilinin payız semestrinin imtahan sessiyasının mövcud qaydalara uyğun təşkil edilməsi, tələbələrin biliyinin qiymətləndirilməsində şəffaflığın və obyektivliyin təmin edilməsi, imtahan sessiyasının mövcud normativ sənədlər əsasında keçirilməsi, təhsil müəssisələrində imtahan qərargahlarının yaradılması, bu qərargahlara daxil olan hər bir şikayətin qısa müddətdə çevik şəkildə araşdırılıb lazımi tədbir görülməsi, eyni zamanda, imtahanlarda şəffaflığın təmin edilməsi üçün ictimaiyyət nümayəndələrinin və tələbələrin valideynlərinin iştirakına şərait yaradılması öz əksini tapıb.

GDU-da bu əmrin icrası ilə bağlı müvafiq əmr imzalanıb. Əmrə əsasən, sessiya başlamazdan öncə imtahanların şəffaf və obyektiv keçirilməsi məqsədilə fakültə dekanları, kafedra müdirləri qarşısında konkret vəzifələr qoyulub. Hazırda imtahanlar şifahi, yazılı, test və qabiliyyət formalarında aparılır. Sessiyanın gedişi zamanı imtahanların nəticəsindən asılı olaraq yarana biləcək narazılıqların mövcud qaydada araşdırılması və həlli məqsədilə Qərargah və onun nəzdində universitet üzrə “Qaynar xətt” yaradılıb. Payız imtahan sessiyasının gedişinə operativ nəzarət etmək üçün təşkil edilmiş komissiyaların rəhbərləri və nümayəndələri fakültələr və tədris korpusları üzrə təhkim olunublar.

Eyni zamanda, universitetin rektoru, professor Yusif Yusibov imtahan prosesini müşahidə edir, tələbələrin imtahanların gedişinə münasibəti ilə maraqlanır və zəruri tapşırıqlarını verir.

Yanvarın 3-dən etibarən imtahan komissiyası rəhbəri və üzvləri imtahan prosesini müşahidə etməklə yanaşı, imtahanların gedişi ilə bağlı tələbələrin fikirlərini və onları maraqlandıran sualları dinləyib, müvafiq strukturların rəhbərlərinə göstəriş və tapşırıqlarını veriblər.

Tələbələr universitetdə imtahan zamanı obyektivliyin və şəffaflığın təmin olunması istiqamətində görülən işləri yüksək qiymətləndiriblər.

Qeyd edək ki, həmişə olduğu kimi, bu il də universitetdə imtahanlar ictimaiyyətə açıq keçirilir. İmtahan sessiyası dövründə universitetin İctimai Nəzarət Şurasının, valideynlərin və ictimaiyyət nümayəndələrinin iştirakı ilə “Açıq qapı” günlərinin keçirilməsi də nəzərdə tutulub.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.