REGİONLAR
Gəncə Dövlət Universitetinin məzunları 50 ildən sonra bir araya gəliblər
Gəncə, 18 may, Elcan Məmmədov, AZƏRTAC
Gəncə Dövlət Universitetində (GDU) Riyaziyyat fakültəsini 1972-ci ildə bitirən məzunların görüşü keçirilib.
Universitetdən AZƏRTAC-ın bölgə müxbirinə verilən məlumata görə, tədbir iştirakçıları əvvəlcə Vətən müharibəsində şəhid olan universitet tələbələrinin xatirəsinə düzəldilən guşəni ziyarət edib, önünə gül dəstələri düzüblər.
Tədbirdə əvvəlcə Dövlət Himni səsləndirilib, Qarabağ müharibəsi şəhidlərinin, eləcə də dünyasını dəyişən professor-müəllim heyətinin və məzunların xatirəsi yad edilib.
Çıxış edən universitetin humanitar məsələlər üzrə prorektoru Gülsüm Fətəliyeva məzunları ali təhsil ocağının rəhbərliyi adından salamlayıb, onları yenidən universitetdə görməkdən məmnun olduğunu bildirib. Bu cür tədbirlərin keçirməsinin əhəmiyyətini vurğulayan prorektor, məzunlara və qonaqlara GDU-nun son illərdəki fəaliyyəti və uğurları barədə məlumat verib, tələbələrin keyfiyyətli təhsil almaları üçün yaradılan şəraitdən danışıb.
Görüşün əsas təşkilatçılarından olan məzun, universiteti bitirdikdən sonra ötən dövrdə Azərbaycan Milli Elmlər Akademiyasında çalışmış, bir neçə elmi kitabın müəllifi olan, pedaqoji elmlər namizədi Sabir Tağıyev çıxış edərək, tədbirin təşkili üçün universitet rektorluğuna və bu işə dəstək olan hər kəsə təşəkkürünü bildirib, görüşə hazırlaşarkən və məzunları soraqlayarkən keçirdiyi hisslərdən danışıb. Sabir Tağıyev sevimli müəllimlərini xatırlayaraq onların tələbkarlığından söz açıb, bilikli və vicdanlı şəxsiyyət kimi daim xatirələrdə yaşayacaqlarını qeyd edib. O, tələbə yoldaşlarını yenidən görməyi həyatının ən xoş anları olduğunu dilə gətirib və onlara bundan sonrakı həyatlarında uğurlar arzulayıb.
Məzunlardan Şərafət Hacıyeva, Vidadi İbrahimov, Familə Bayramova, Tahir Cəbrayılov və başqaları xoş xatirələrini danışaraq, görüşün təşkilinə dəstək olan Gəncə Dövlət Universitetinin rəhbərliyinə təşəkkürlərini bildiriblər.
Sonda xatirə şəkli çəkdirilib.