ELM VƏ TƏHSİL
Gəncə Dövlət Universitetinin yeni rektoru kollektivə təqdim edilmişdir
Gəncə, 19 fevral (AZƏRTAC). Fevralın 19-da təhsil naziri Misir Mərdanov Gəncə Dövlət Universitetinin yeni rektorunun kollektivə təqdim edilməsi ilə bağlı Gəncədə olmuşdur.
AZƏRTAC xəbər verir ki, bu münasibətlə keçirilən tədbirdə çıxış edən Misir Mərdanov son illər ölkədə aparılan abadlıq və quruculuq işlərindən, eləcə də dövlətimizin başçısının diqqət və qayğısı sayəsində həyata keçirilən təhsil islahatlarının verdiyi bəhrələrdən danışmışdır.
Nazir qeyd etmişdir ki, keçmiş SSRİ-dən qalmış 5 minədək yararsız halda olan orta məktəb binalarının artıq yarıdan çoxu yenidən inşa edilmiş, onların maddi-texniki bazasının gücləndirilməsi istiqamətində böyük işlər görülmüşdür.
Tədbirdə xüsusi vurğulanmışdır ki, Azərbaycanın birinci xanımı, Heydər Əliyev Fondunun prezidenti, UNESCO-nun və İSESCO-nun xoşməramlı səfiri, Milli Məclisin deputatı Mehriban Əliyevanın “Yeniləşən Azərbaycana-yeni məktəb” devizi ilə həyata keçirdiyi məqsədyönlü tədbirlər respublikamızda təhsilin inkişafına böyük təkan vermiş, ən ucqar kəndlərdə belə müasir tədris ocaqları inşa edilmişdir.
Sonra nazir Gəncə Dövlət Universitetində yaranmış mənfi hallarla bağlı burada aparılan kadr dəyişikliyindən danışmış və universitetin yeni rəhbərini, uzun illər burada işləyən Yadigar Əliyevi kollektivə təqdim etmişdir.
Yadigar Əliyev yüksək etimada görə Azərbaycan Prezidenti İlham Əliyevə minnətdarlığını bildirmiş və ona göstərilən bu etimadı doğrultmaq üçün əlindən gələni əsirgəməyəcəyinə söz vermişdir.
Mərasimdə Gəncə Şəhər İcra Hakimiyyətinin başçısı Elmar Vəliyev çıxış edərək Azərbaycanda ikinci elm və təhsil mərkəzi olan Gəncədə görülən işlərdən danışmış və təhsilin inkişafı sahəsində həyata keçirilən işləri diqqətə çatdırmışdır.
Universitetin professorları Sədnik Paşayev, Abbas Səmədov, dosentlərdən Pərvin Kərimova və tələbə-gənclər təşkilatının sədri Nigar Talıbova Gəncə Dövlət Universitetində həyata keçirilməsi vacib olan tədbirlərdən danışmışlar.
Təhsil naziri Misir Mərdanov mərasimə yekun vurmuşdur.