REGİONLAR


Gəncədə “Vəhdət dəyərimizdir” layihəsi çərçivəsində üç günlük seminar keçirilir

Gəncə, 23 sentyabr, Rauf Hacıyev, AZƏRTAC

Sentyabrın 23-də Mənəvi Dəyərlərin Təbliği Fondunun təşkilatçılığı ilə “Vəhdət dəyərimizdir” layihəsi çərçivəsində Gəncə şəhərində həyata keçirilən üç günlük seminarın açılış mərasimi olub.

Açılış mərasimindən əvvəl Gəncə şəhərində ümummilli lider Heydər Əliyevin abidəsi ziyarət olunub, dahi rəhbərin əziz xatirəsi ehtiramla yad edilib.

Tədbirdə Fondun icraçı direktoru Mehman İsmayılov, icraçı direktorun müavini Rəfi Qurbanov, Dini Qurumlarla İş üzrə Dövlət Komitəsinin (DQİDK) Gəncə bölgəsi üzrə şöbəsinin müdiri Asif Əliyev, Azərbaycan İlahiyyat İnstitutunun müəllimi Vüqar Səmədov, Şamaxı, İsmayıllı, Ağdaş, Göyçay, Şəmkir, Tovuz, Qazax, Ağstafa rayonlarından, eləcə də Gəncə və Mingəçevir şəhərlərindən olan dini icma sədrləri və din xadimləri iştirak ediblər.

AZƏRTAC-ın bölgə müxbiri xəbər verir ki, tədbiri açan DQİDK-nın Gəncə bölgəsi üzrə şöbəsinin müdiri Asif Əliyev seminarın Gəncə şəhərində keçirilməsindən məmnunluğunu ifadə edib. Seminarın təşkilatçıları və iştirakçılarına təşəkkürünü bildirən A.Əliyev “Vəhdət dəyərimizdir” layihəsinin işinə uğurlar arzulayıb.

Tədbirdə çıxış edən Fondun icraçı direktoru Mehman İsmayılov layihə haqqında danışaraq bildirib ki, "Vəhdət dəyərimizdir" layihəsi çərçivəsində seminarlar bundan əvvəl Lənkəran, Zaqatala və Oğuz rayonlarında keçirilib. Gəncədə keçirilən seminar layihənin sayca 4-cü tədbiridir. Layihədə bu günədək ölkənin 40-dək bölgəsindən 400-ə yaxın din xadimi iştirak edib.

Vurğulanıb ki, "Vəhdət dəyərimizdir" layihəsinin keçirilməsində əsas məqsəd ölkənin müxtəlif bölgələrindən olan din xadimlərinin bir araya gələrək mehribanlığın, dostluğun yaranmasına, onların bir-birilərini tanıyaraq aralarında vəhdətin, birliyin daha da möhkəmlənməsinə töhfə verməkdir. Bu cür tədbirlər növbəti illərdə də davam etdiriləcək.

Daha sonra Dini Qurumlarla İş üzrə Dövlət Komitəsinin sifarişi ilə hazırlanmış "Vəhdət qanımızdadır" sənədli filmi nümayiş olunub.

Qeyd edək ki, 23-25 sentyabr tarixlərini əhatə edən seminar çərçivəsində Gəncə şəhərinin dini-tarixi, mədəni abidələrinin ziyarəti, birgə namazın qılınması, ekspertlər tərəfindən mühazirələrin oxunması nəzərdə tutulur.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.