Gəncədə enerji təchizatı sisteminin normal fəaliyyəti təmin olunub

Bakı, 2 noyabr, AZƏRTAC

Bu ilin ötən aylarında “Gəncə” Regional Elektrik Şəbəkəsi Müəssisəsi üzrə 110 və 35 kilovoltluq (kV) yarımstansiyalarda, transformator məntəqələrində, eyni zamanda, 10, 6 və 0,4 kilovoltluq şəbəkələrdə əsaslı və cari təmir işləri görülüb.

“Azərenerji” ASC-nin mətbuat xidmətindən AZƏRTAC-a bildirilib ki, bu dövrdə 3250-yə yaxın yeni sayğac quraşdırılıb, 3320-dən artıq qüsurlu sayğac isə yeniləri ilə əvəzlənib. Eyni zamanda, 4,3 kilometr uzunluğunda SİP və AVVQ tipli kabel çəkilib.

Smart-kart tipli sayğacların quraşdırılmasına və SİP kabelinin çəkilişinə respublikada ilk dəfə Gəncədə başlanılıb. Nəticədə həm enerji təchizatı sisteminin normal fəaliyyəti təmin edilib, həm də istehlak olunmuş enerjinin dəyəri tam ödənilir.