REGİONLAR


Gəncədə istiqlal şairi Əhməd Cavadın 130 illiyinə həsr olunan yubiley tədbiri keçirilib

Gəncə, 5 may, Elcan Məmmədov, AZƏRTAC

Mədəniyyət Nazirliyi və Gəncə Şəhər İcra Hakimiyyətinin dəstəyi, Gəncə Regional Mədəniyyət İdarəsinin təşəbbüsü, F.Əmirov adına Gəncə Dövlət Filarmoniyasının təşkilatçılığı ilə Azərbaycan ədəbiyyatının görkəmli nümayəndəsi, şair, tərcüməçi, tanınmış maarifçi və ictimai xadim, Azərbaycan Respublikasının Dövlət Himninin sözlərinin müəllifi Əhməd Cavadın 130 illiyinə həsr olunmuş tədbir keçirilib.

Şəhər İcra Hakimiyyətindən AZƏRTAC-ın bölgə müxbirinə verilən məlumata görə, tədbir iştirakçıları əvvəlcə "Uşaq və Yeniyetmələrə Dəstək” İctimai Birliyi (UYD) tərəfindən icra olunan "Rənglənmiş tarix" Şuşa musiqiçilərinə məxsus sənədli abidələrin qorunması və təbliği layihəsi çərçivəsində təşkil olunan sərgiyə baxış keçiriblər.

Yubiley tədbirində Gəncə Şəhər İcra Hakimiyyətinin başçısı Niyazi Bayramov, Türkiyənin Gəncədəki Baş konsulu Zəki Öztürk, Gəncə Regional Mədəniyyət İdarəsinin rəisi Vasif Cənnətov, Əhməd Cavadın ailə üzvləri, idarə, müəssisə rəhbərləri, ziyalılar, şəhər ictimaiyyətinin nümayəndələri, mədəniyyət və incəsənət işçiləri iştirak ediblər.

Sərgi barədə məlumat verən UYD-nin sədri Fərhad Abdulov bildirib ki, Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə yardımı ilə reallaşan layihənin məqsədi Şuşa musiqiçilərinə aid sənədli abidələrin qorunması və təbliğidir. Layihə çərçivəsində Şuşa musiqiçilərinə məxsus 25 ədəd ağ-qara fotoşəkil rəqəmsal üsullar ilə bərpa olunub və rənglənib. Şəkillər arasında Üzeyir Hacıbəyli, Bülbül, Cabbar Qaryağdıoğlu, maestro Niyazi, Ceyhun Hacıbəyli, Fikrət Əmirov, Xan Şuşinski, Rəşid Behbudov, Seyid Şuşinski, Soltan Hacıbəyli, Süleyman Ələsgərov kimi musiqiçilərin fotoları yer alıb. Sözügedən şəkillər Azərbaycanın 8 regionunda sərgilənəcək.

İstiqlal şairi Əhməd Cavadın 130 illiyinə həsr olunmuş yubiley tədbirində əvvəl Azərbaycanın müstəqilliyi, suverenliyi və ərazi bütövlüyü uğrunda şəhadətə yüksələn Vətən övladlarının əziz xatirəsi yad edilib.

Sonra sözləri Əhməd Cavada, musiqisi dahi Azərbaycan bəstəkarı Üzeyir Hacıbəyliyə məxsus olan Dövlət Himni səsləndirilib.

Tədbirdə çıxış edən Gəncə Regional Mədəniyyət İdarəsinin rəisi Vasif Cənnətov, şairin nəvəsi Süleyman Axundzadə, nəticəsi Cavad Axundzadə, kötücəsi Nərgiz Əhməd qızı, “Cavad xan” Tarix Mədəniyyət Fondunun birinci vitse-prezidenti Müzadil Həsənov çıxış edərək, Əhməd Cavadın həyatı, ədəbi yaradıcılığı, ictimai-siyasi fəaliyyətindən söz açıblar.

Yubiley tədbiri konsert proqramı ilə davam edib. F.Əmirov adına Gəncə Dövlət Filarmoniyasının “Xəmsə” estrada və “Göygöl” Dövlət Mahnı və Rəqs ansambllarının, Gəncə Şəhər Uşaq İncəsənət Məktəbinin “Xəmsə” nağaraçalanlar ansamblının çıxışları rəğbətlə qarşılanıb. Konsert zamanı istiqlal şairi Əhməd Cavadın şeirlərinə bəstələnən “Çırpınırdın, Qara dəniz”, “Gəncədən gəlirəm”, “Şükriyyə”, “Gəncəm, hey!”, “Can, Azərbaycan”, “Sıravi Əhməd” mahnıları ifa olunub.

Qeyd edək ki, sözügedən tədbir Əhməd Cavadın 130 illiyinin qeyd edilməsi haqqında Azərbaycan Respublikası Prezidentinin 20 aprel 2022-ci il tarixli Sərəncamına uyğun olaraq təşkil olunub.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.