Kiyev, 1 fevral, AZƏRTAC

Ötən ilin sonunda gənclər arasında Ukrayna və Azərbaycan arasında diplomatik münasibətlərin yaradılmasının 30 illiyinə həsr olunan Ümumukrayna videomateriallar müsabiqəsi elan edilib. Rusiya-Ukrayna müharibəsi səbəbindən yaranmış çətin şəraitə görə bir çox gənclər ya işlərini yekunlaşdıra bilməyiblər, ya da müsabiqədə iştirak etməyiblər.

AZƏRTAC xəbər verir ki, daha çox tələbənin iştirakı və kütləviliyin təşkili üçün müsabiqə bu il də davam etdirilir.

Müsabiqəni Ukrayna-Azərbaycan layihələrinin kuratoru Marına Qonçaruk həyata keçirir.

Marına Qonçaruk deyib: “Ötən 30 il ərzində ölkələrimiz arasında münasibətlər strateji xarakter alıb və indi bu çətin zamanda ukraynalılar bizim ərazi bütövlüyümüzü dəstəkləyən və humanitar yardım edən qardaş Azərbaycanın köməyini hiss edirlər. Müharibəyə baxmayaraq, mədəniyyət, təhsil və gənclər sahəsində Ukrayna-Azərbaycan dialoqunu qoruyub saxlamaq çox vacibdir. Bu, Azərbaycanın onların həyatının bir hissəsinə çevrildiyi və gələcəyini, fəaliyyətlərini ölkənizlə əlaqələndirməyi planlaşdıran tələbələr üçün daha da əhəmiyyətlidir. Onlara Azərbaycanı öyrənmək və Ukrayna-Azərbaycan layihələrində iştirak etmək imkanı yaratmaq lazımdır. Azərbaycanın İkinci Qarabağ müharibəsində Qələbəsi digər xalqları, o cümlədən Ukrayna xalqını da, ərazi bütövlüyünün bərpası uğrunda mübarizə aparmağa ruhlandırır”.

“Dost ölkələrimiz arasında səmimi dövlətlərarası və şəxsiyyətlərarası münasibətlərin mövcud olduğunu görmək çox xoşdur. Bu dövlətlərimiz arasında siyasi, iqtisadi və humanitar qlobal əməkdaşlıq spektrinin mövcudluğunu şərtləndirib. Bu ölkə ilə ilk tanışlıqdan bu vaxta kimi mən Azərbaycan mədəniyyətinin, tarixinin yayılması, eləcə də Ukrayna-Azərbaycan münasibətlərinin inkişafı və möhkəmləndirilməsi istiqamətində gənclər arasında fəal iş aparıram”, - deyə Darina Sadovaya qeyd edib.

Roman Popov: “2021-ci ildə mənə Azərbaycanın paytaxtı Bakı şəhərinə səfər etmək qismət oldu. Mən bu ölkədə qonaq olsam da, Azərbaycan qonaqpərvərliyi sayəsində özümü evimdəki kimi hiss edirdim. Buna görə də bakılılara minnətdaram. O zaman anladım ki, Azərbaycan və Ukrayna xalqları qonaqlara münasibətdə bir-birinə çox bənzəyir. Ukrayna və Azərbaycanı sülh, firavanlıq və inkişaf üçün səyləri birləşdirir. Əminəm ki, gələcəkdə ölkələrimiz arasında münasibətlər daha da möhkəmlənəcəkdir. Ukrayna üçün Azərbaycan təkcə strateji tərəfdaş deyil, həm də çətin zamanlarda dəstək göstərən sadiq tərəfdaş və dostdur”.

“Mən ukraynalı azərbaycanlıyam və bununla çox fəxr edirəm. Ukrayna və Azərbaycan bir-birilərinin ərazi bütövlüyünü dəstəkləyir və bu çox vacibdir. Birinci Qarabağ müharibəsi zamanı Azərbaycan tərəfində çoxlu sayda ukraynalı döyüşüb. Onların arasında Azərbaycan uğrunda döyüşərək həlak olan və Azərbaycanın Milli qəhrəmanları olan ukraynalılar da var. İndi Ukraynada yaşayan azərbaycanlılar da hazırda bu ölkədə gedən müharibədən kənarda qalmayaraq Ukraynanı müdafiə edirlər”, – deyə Emil Musayev fikirlərini ifadə edib.

Darya Ponomarenko: “Təəssüf ki, bu gün Ukraynanın beynəlxalq dəstəyə həmişəkindən daha çox ehtiyacı var. Belə dəstəyi, xüsusilə, strateji tərəfdaşımız Azərbaycan göstərir. Buna görə biz Azərbaycan xalqına minnətdar olmalı və xatırlamalıyıq ki, ukraynalılarla birlikdə Ukraynanın Silahlı Qüvvələrində təcavüzkarı dayandırmaq üçün həyatlarını qurban verməyə hazır olan etnik azərbaycanlılar döyüşür. Demək istəyirəm ki, Azərbaycanı çox sevirəm. 2021-ci ildə mənə Bakıya səfər etmək və bu unikal mədəniyyət ilə yaxından tanış olmaq qismət oldu. Hər kəsə bu ecazkar şəhərə səfər etməyi, ukraynalılara isə bunu qaçqınlar kimi deyil, turist kimi Qələbəmizdən sonra etməyi məsləhət görürəm”.

Vladislav Povolotski deyib: “2022-ci ildə biz Ukrayna və Azərbaycan arasında diplomatik münasibətlərin bərpasının 30 illiyini qeyd edirik. Ukrayna və Azərbaycan arasında ikitərəfli əlaqələrin inkişafı və möhkəmləndirilməsi etibar və dəstək kimi amillərə əsaslanır. Bu mühüm strateji münasibətlər birgə səylərimiz sayəsində xalqlarımızın iradəsinə uyğun olaraq bundan sonra da uğurla inkişaf edəcək və genişlənəcək”.

“Ukrayna və Azərbaycan xalqları qardaş xalqlardır, bu tarixdə dəfələrlə təsdiq olunub. Ukraynalı gürcü kimi əminliklə deyə bilərəm ki, Ukrayna, Gürcüstan və Azərbaycan Respublikası strateji tərəfdaşlardır. Bizim münasibətlərimiz xalqlarımız üçün ümumi sülh, sabitlik və firavanlıq arzusu üzərində qurulur”, – deyə David Qoqiya qeyd edib.

Emil Hüseynli

AZƏRTAC-ın xüsusi müxbiri

Kiyev