CƏMİYYƏT


“Gənclər davamlı inkişaf üçün” layihəsinin ilk mərhələsinə yekun vurulub

Bakı, 20 iyun, AZƏRTAC

“İrəli” İctimai Birliyinin təşkilatçılığı, Azərbaycan Gənclər Fondunun dəstəyi ilə həyata keçirilən “Gənclər davamlı inkişaf üçün” layihəsinin ilk mərhələsinə yekun vurulub.

“İrəli” İctimai Birliyindən AZƏRTAC-a bildiriblər ki, layihənin əsas məqsədi gənclərin bacarıqlarının gücləndirilməsi, region gənclərinin inkişafı istiqamətində təşəbbüslərin artması ilə ümumilikdə gənclər şəbəkəsinin inkişafına töhfə verməkdir.

Gənclər paytaxtı Tovuz rayonunda keçirilən layihə çərçivəsində respublikamızın müxtəlif regionlarını təmsil edən 30 nəfər gənc bir həftə müddətində komandanın güclü və zəif tərəflərinin müəyyən edilməsi, gənclərin ictimai həyatda iştirakçılığı, icma quruculuğu və digər mövzularda müxtəlif təlim sessiyalarında iştirak ediblər. Həmçinin layihə boyunca gənclərlə işləyən şəxslər qeyri-formal təhsil və onun prinsipləri, tədqiqat bacarıqları və regionlarda data analizi haqqında yeni məlumatlar əldə edərək, praktiki tapşırıqlar icra ediblər.

Qeyd olunub ki, layihənin növbəti mərhələlərində gənclər öyrəndikləri bilik və təcrübələri öz yaşadıqları regionlarda təlim və görüş formatında digər gənclərlə bölüşəcək, habelə region gəncləri arasında sorğular keçirəcəklər. Sorğulardan əldə ediləcək nəticələr vasitəsilə region gənclərinin ehtiyac və problemləri öyrənilməsi, bu istiqamətdə təklif paketinin hazırlanması nəzərdə tutulur.

Layihə Gənclərin İnkişaf və Karyera Mərkəzi və Azərbaycan Gənc Müəllimlər Assosiasiyasının tərəfdaşlığı ilə keçirilir və ilkin olaraq 23 şəhər və rayondan ümumilikdə 15 min gəncin əhatə olunması hədəflənib.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.