CƏMİYYƏT


Gənclər üçün “Yaradıcılıq”, “Xeyriyyəçilik” və “Könüllülük” müsabiqələrinin qalibləri elan olunub

Bakı, 30 iyun, AZƏRTAC

İslam Əməkdaşlıq Təşkilatı Gənclər Forumunun (İƏT GF) Bakıda yerləşən Avrasiya üzrə Regional Mərkəzinin təşkilatçılığı, Pakistan, Rumıniya, Qazaxıstan və Rusiya Federasiyası Tatarıstan Respublikasından olan gənclər təşkilatlarının tərəfdaşlığı ilə may-iyun aylarında onlayn formatda keçirilən yaradıcılıq, könüllülük və xeyriyyəçilik üzrə müsabiqələrə yekun vurulub.

Regional Mərkəzdən AZƏRTAC-a bildiriblər ki, bu qurumun əhatə etdiyi coğrafiyada 14-35 yaşlı yeniyetmə və gənclər arasında beynəlxalq səviyyədə keçirilən müsabiqənin məqsədi pandemiya dövründə gənclərin yaradıcılıq fəaliyyətini dəstəkləmək, həmçinin könüllülük və xeyriyyəçilik kimi müsbət davranış və fəaliyyətlərin gənclər arasında təbliği olub.

Müsabiqələr üzrə yaradılmış münsiflər heyətinin yekdil qərarına əsasən, ölkəmizdən olan və Azərbaycan Respublikası Dağlıq Qarabağ bölgəsinin azərbaycanlı icmasının Qarabağ Könüllüləri platformasını təmsil edən Suad Muradov “Könüllüllük”, Pakistandan olan gənc fəal Qaiser Navab “Xeyriyyəçilik” və malayziyalı gənc qrafik dizayner İffah Rezali “Yaradıcılıq” müsabiqələrinin qalibləri elan ediliblər.

“CreaTest” yaradıcılıq müsabiqəsində gənclər yaşadıqları cəmiyyətlərdəki mövcud aktual məsələlərə toxunan, yerli və ya qlobal mesajlar ehtiva edən posterlər hazırlayıb təqdim ediblər. “ChariTest” xeyriyyəçilik müsabiqəsi gənclər tərəfindən sosial gəliri aşağı olan icma və qruplar və ya aztəminatlı ailələr üçün yardım layihələrinin təqdim edilməsini nəzərdə tutub. “VolunTest” könüllülük müsabiqəsində isə gənclər pandemiya dövründə həyata keçirdikləri könüllülük fəaliyyətləri ilə bağlı ətraflı məlumat təqdim ediblər. Hər üç nominasiya üzrə qaliblərə müvafiq pul mükafatları təsis edilib.

“CreaTest” müsabiqəsi İƏT Gənclər Forumunun İstanbuldakı qərargahının əməkdaşlığı ilə ümumilikdə İƏT coğrafiyası üzrə həyata keçirilib.

Uğurla keçirilən müsabiqələrə gənclər böyük maraq göstəriblər. Ümumilikdə 30-dan artıq ölkədən yüzlərlə müraciət qəbul olunub.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.