CƏMİYYƏT


Gənclər üçün bütün imkan və xidmətlərin təqdim olunduğu vahid elektron platforma yaradılıb VİDEO

Bakı, 30 sentyabr, H.Mahmudova, S.Quliyev, AZƏRTAC

Sentyabrın 30-da Azərbaycan Respublikasının Gənclər Fondunun təşkilatçılığı ilə Bakı Konqres Mərkəzində dövlət və özəl sektorun, eləcə də beynəlxalq təşkilatların gənclər üçün təklif etdiyi imkanlar, xidmətlər, tədbir və layihələr barədə məlumatların təqdim olunduğu vahid informasiya portalının - “GəncApp” mobil tətbiqinin və genc.az internet saytının təqdimatı keçirilib.

AZƏRTAC xəbər verir ki, tədbirdə əvvəlcə “GəncApp” mobil tətbiqi barədə videoçarx nümayiş etdirilib.

Azərbaycan Respublikası Gənclər Fondunun icraçı direktoru Fərid Cəfərov, Gənclər və İdman nazirinin müavini İntiqam Babayev, Nəqliyyat, Rabitə və Yüksək Texnologiyalar Nazirliyinin tabeliyindəki İnnovasiyalar Agentliyinin rəhbəri Tural Kərimli, Əmək və Əhalinin Sosial Müdafiəsi Nazirliyi yanında Dövlət Məşğulluq Xidmətinin rəisi Fuad Musayev və Vətəndaşlara Xidmət və Sosial İnnovasiyalar üzrə Dövlət Agentliyinin tabeliyindəki İnnovasiyalar Mərkəzinin direktoru Tağı Tağızadə tədbirdə çıxış edərək dövlət tərəfindən müxtəlif sahələrdə gənclər üçün yaradılan imkanlar barədə məlumat veriblər. “GəncApp” portalının bu imkanların gənclərə çatdırılması baxımından əhəmiyyətini vurğulayan natiqlər bildiriblər ki, Azərbaycan gəncliyinin hərtərəfli inkişafının dəstəklənməsi Prezident İlham Əliyevin həyata keçirdiyi dövlət gənclər siyasətinin əsas istiqamətini təşkil edir. Bu siyasətin bariz nümunəsidir ki, dövlət tərəfindən gənclərin keyfiyyətli təhsil və dayanıqlı məşğulluq ilə təmin olunması, onların asudə vaxtının və şəxsi inkişafının səmərəli təşkili, beynəlxalq təmsilçiliyinin artırılması, sağlamlığının mühafizəsi və milli-mənəvi dəyərlərə bağlı vətəndaş kimi yetişmələri üçün geniş imkanlar yaradılıb.

Məlumat verilib ki, tətbiq ölkə daxilində və xaricdə təşkil edilən tədbirlər, düşərgələr, mübadilə proqramları və layihələr barədə məlumat əldə etmək və onlara qoşulmaq imkanı təklif edir. Bununla yanaşı, istifadəçilər müxtəlif yerli və xarici qurumların təqaüd proqramları, xaricdə təhsil və təcrübə təklifləri, qrant müsabiqələri və digər elanları barədə “GəncApp” vasitəsilə xəbər tutacaq və tətbiqdən istifadə etməklə bu imkanlardan yararlana biləcəklər.

Son illər ölkəmizdə geniş vüsət alan könüllülər hərəkatında gənclərin iştirak imkanı da bu tətbiqdə nəzərə alınıb. Belə ki, platforma gənclərə könüllük hərəkatının tədbir və layihələri barədə məlumat təqdim etməklə yanaşı, onlara maraq dairələrinə uyğun olaraq könüllülük hərəkatına, ictimai faydalı işlərə qoşulmaq, bilik və bacarıqlarını artırmaq imkanı təklif edir.

“GəncApp”ın təklif etdiyi interaktiv xəritə funksiyası Bakıda və regionlardakı Heydər Əliyev mərkəzləri, Gənclər evləri, karyera inkişaf mərkəzləri, gənclər təşkilatları, kitabxanalar, teatr, kino mərkəzləri, milli parklar, Olimpiya İdman komplekslərinin imkan və xidmətlərini daha əlçatan edir.

Tətbiqin üstünlüklərindən biri də ödənişsiz CV generator funksiyasıdır. Gənclər bu funksiya sayəsində CV-lərini düzgün formada yaradaraq istifadə etmək, xüsusi bölmədə göstərilən vakansiyalara göndərmək imkanına sahib olacaqlar. Yeni mobil tətbiq şəxsi kabinetdən fəaliyyət tarixçəsini izləməklə yanaşı, dövlət qurumları və şirkətlərlə interaktiv təmas şansı təqdim edir. Mobil tətbiqin üç dildə - Azərbaycan, rus və ingilis dillərində fəaliyyəti nəzərdə tutulub.

Məlumat verilib ki, “GəncApp” mobil tətbiqinin məqsədi gənclər sahəsində həyata keçirilən tədbirlər, layihələr və təşəbbüslər barədə yeniliklər, eləcə də mövcud dövlət dəstəyi mexanizmləri və xidmətləri barədə ətraflı məlumatların gənclərə vahid mərkəzləşdirilmiş elektron formada səmərəli şəkildə çatdırılması, eyni zamanda, bu tətbiq vasitəsilə gənclərə həmin xidmətlərdən yararlanmaq imkanı verməsidir.

“GəncApp” tətbiqinin yaradılması Prezident İlham Əliyevin ölkə gəncliyinə xüsusi qayğısının, onların qarşılaşdığı çağırışların həllinə dəstəyinin növbəti nümunəsi, həmçinin dövlət xidmətlərinin rəqəmsallaşdırılması və vətəndaşlara daha da yaxınlaşdırılmasının bariz təzahürüdür.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.