CƏMİYYƏT


Gənclərin İnkişaf və Karyera Mərkəzinin daha dörd rayonda nümayəndəlikləri fəaliyyətə başlayıb

Bakı, 28 oktyabr, AZƏRTAC

Gənclərin İnkişaf və Karyera Mərkəzinin (GİKM) növbəti nümayəndəlikləri Salyan, Hacıqabul, İmişli və Ucar rayonlarındakı Heydər Əliyev mərkəzlərində fəaliyyətə başlayıb.

GIKM-dən AZƏRTAC-a bildiriblər ki, açılış mərasimlərində rayon icra hakimiyyətlərinin, Gənclər Fondunun, Gənclərin İnkişaf və Karyera Mərkəzinin nümayəndələri və region gəncləri iştirak ediblər.

Açılış tədbirləri gənclərlə söhbət və mərkəzlərlə tanışlıqla başlayıb.

Sonra rəsmi nümayəndələr çıxış edərək Prezident, Müzəffər Ali Baş Komandan İlham Əliyevin rəhbərliyi ilə Vətən müharibəsində qazanılmış şanlı Qələbə sayəsində Azərbaycan gənclərinin artıq qalib xalqın nümayəndələri olduqlarını, bunun böyük mənəvi və psixoloji mənasının olduğunu xüsusi bildiriblər.

Daha sonra nümayəndəliklərin direktorları Azərbaycan Respublikasının Prezidenti İlham Əliyevin rəhbərliyi və şanlı ordumuzun şücaəti ilə Vətən müharibəsində qazanılmış Zəfər fonunda mühüm tarixi dövrdə yaşadığımızı xüsusi vurğulayaraq, ölkəmizdə həyata keçirilən uğurlu dövlət gənclər siyasətindən, GİKM nümayəndəliklərində gənclər üçün yaradılan imkanlardan danışıb və gəncləri bu imkanlardan yararlanmağa dəvət ediblər. Yeni yaradılan nümayəndəliklərdə gənclərin əlavə bilik və bacarıqlara yiyələnməsi üçün müxtəlif peşə təlimləri, təhsil və təcrübə proqramları, görüşlər, seminarlar, intellektual oyunlar və digər tədbirlər təşkil olunacaq. Nümayəndəliklər vasitəsilə regionda yaşayan gənclər dövlət tərəfindən onlar üçün yaradılan imkanlar barədə məlumat və məsləhət almaq, həmçinin müxtəlif proqramlara müraciət və onlarda iştirak etmək imkanı qazanacaqlar. Açılış tədbirlərində iştirak edən gənclərə, həmçinin “Gənc könüllü”, təcrübəçi və üzvlük proqramı haqqında məlumat verilib, onlar bu proqramlara qoşulmağa dəvət ediliblər.

Diqqətə çatdırılıb ki, ölkəmizin şəhər və rayonlarında yaşayan gənclərin dövlət tərəfindən onlar üçün yaradılmış imkanlardan tam şəkildə yararlanmasının təmin edilməsi ilə bağlı Azərbaycan Prezidentinin imzaladığı Sərəncama uyğun olaraq, GİKM-lərin fəaliyyəti gənclərin hərtərəfli inkişafının təmin olunması, habelə ümummilli lider Heydər Əliyevin dövlətçilik fəlsəfəsini, azərbaycançılıq məfkurəsini gənc nəslin daha dərindən mənimsəməsi işinə töhfə vermək istiqamətində qurulub.

Tədbir daha öncə açılışı olmuş nümayəndəliklərin fəaliyyətinə dair əyləncəli videoçarxların nümayişi, maraqlı viktorinalar və təlim xarakterli oyunlarla davam etdirilib.

Bununla da Gənclərin İnkişaf və Karyera mərkəzlərinin nümayəndəliklərinin fəaliyyətə başladığı şəhər və rayonların sayı 50-yə çatıb. Bu ilin sonunadək ölkənin bütün şəhər və rayonlarında mövcud Heydər Əliyev Mərkəzlərində Gənclərin İnkişaf və Karyera Mərkəzinin nümayəndəliklərinin açılması nəzərdə tutulur.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.