ELM VƏ TƏHSİL
“Gənclərin sahibkarlıq fəaliyyətinə dəstək” layihəsinin təqdimatı olub
Bakı, 21 noyabr, P.İmanova, AZƏRTAC
Noyabrın 21-də Azərbaycan Gənclərinin Nailiyyəti İctimai Birliyi Avropa İttifaqı və “PAŞA Bank” tərəfindən maliyyələşdirilən “Gənclərin sahibkarlıq fəaliyyətinə dəstək” layihəsinin açılış konfransını keçirib.
AZƏRTAC xəbər verir ki, konfransda çıxış edən Azərbaycan Gənclərinin Nailiyyəti İctimai Birliyinin idarə heyətinin sədri, “Şevron Xəzər” şirkətinin ölkə üzrə rəhbəri Bəxtiyar Axundov layihə haqqında məlumat verib. Qeyd olunub ki, layihə 2018-2021-ci illərdə Bakı, Gəncə, Qax, Mingəçevir, Xaçmaz, Masallı, Qəbələ və Zaqatalada yerləşən ilk ixtisas peşə və orta məktəblərdə təhsil alan 3 min şagirdi və 150 müəllimi əhatə edəcək. “Gənclərin sahibkarlıq fəaliyyətinə dəstək” layihəsi dörd əsas mərhələdə - maliyyə savadı və sahibkarlığın əsasları istiqamətində metodik vəsaitlərin və elektron resursların hazırlanması, pilot məktəblərdən seçilmiş 150 müəllimin təlimçilərin təliminə cəlb olunaraq peşəkar bacarıqlarının artırılması, şagirdlər üçün məşğələ və təlimlərin təşkili, pilot məktəblərdə özəl sektorun iştirakı ilə sahibkarlıq mərkəzlərinin yaradılması mərhələlərində həyata keçiriləcək. Layihə JA Estoniya, AMFA, BARAMA İnnovasiya və Sahibkarlıq Mərkəzi ilə əməkdaşlıq çərçivəsində icra olunacaq.
Təhsil nazirinin müavini Məhəbbət Vəliyeva çıxışında cəmiyyətin davamlı inkişafında təhsilin mühüm rolunu vurğulayaraq “Azərbaycan Respublikasında təhsilin inkişafı üzrə Dövlət Strategiyası”nın qəbulundan ötən 5 il ərzində görülən işlərdən danışıb və təhsil sahəsində müsbət dinamika müşahidə olunduğunu bildirib. O, gənclər arasında maliyyə savadlılığının və sahibkarlıq bacarıqlarının inkişaf etdirilməsinin əhəmiyyətinə də toxunub. Nazir müavini qeyd edib ki, XXI əsrdə şagirdlərin maliyyə savadlılığına və sahibkarlıq bacarıqlarına yiyələnməsi çox vacibdir. Vurğulanıb ki, “Gənclərin sahibkarlıq fəaliyyətinə dəstək” layihəsinin icrası Təhsil Nazirliyi üçün böyük əhəmiyyət kəsb edir. Təhsil Nazirliyinin bu məsələyə xüsusi önəm verdiyini diqqətə çatdıran Məhəbbət Vəliyeva tərəfdaş qurumlarla birgə məktəblərdə şagirdlərin maliyyə savadlılığının artırılması ilə bağlı mütəmadi təlimlərin təşkil edildiyini bildirib.
Qeyd edilib ki, ölkəmizdə 11 ildir tətbiq olunan yeni təhsil proqramları (kurikulum) əsasında şagirdlərdə aşılanması vacib olan bacarıqlar arasında maliyyə savadlılığı da önəm kəsb edən məsələlərdəndir. Şagirdlər məktəblərdə tədris olunan həyat bilgisi fənni vasitəsilə məhz bu istiqamətdə müvafiq bilik və bacarıqlara yiyələnirlər. Bu gün dövlət və özəl sektor arasındakı əməkdaşlıq nəticəsində məhz XXI əsrin bacarıqlarına yönələn müxtəlif layihələrin tətbiqi Təhsil Nazirliyi qarşısında duran prioritet istiqamətlərdəndir. Bu istiqamətdə müxtəlif miqyasda maliyyə savadlılığının artırılması ilə bağlı layihələr həyata keçirilir.
“Gənclərin sahibkarlıq fəaliyyətinə dəstək” layihəsinin əhəmiyyətini vurğulayan nazir müavini bildirib ki, bu layihə ilkin yaşda uşaqlarda maliyyə savadlılığı və sahibkarlıqla bağlı müvafiq bacarıqların formalaşdırılmasında və onların gələcək həyatlarında iqtisadi cəhətdən özlərini təmin etmələrində mühüm rol oynayacaq. Diqqətə çatdırılıb ki, layihə çərçivəsində tədris və elektron resursların hazırlanması, təlimçi müəllimlərin yetişdirilməsi, ümumtəhsil müəssisələrinin nəzdində sahibkarlıq mərkəzlərinin yaradılması planlaşdırılır.
Layihənin uğurla həyata keçiriləcəyinə əminliyini bildirən Məhəbbət Vəliyeva bunun gələcəkdə dövlət və özəl qurumlarla bu istiqamətdə aparılan işlərə və birgə əməkdaşlığa mühüm töhfə verəcəyini söyləyib.
Konfransda çıxış edən Avropa İttifaqının Azərbaycandakı nümayəndəliyinin rəhbəri Kestutis Yankauskas bu layihənin Avropa İttifaqı ilə Azərbaycan Respublikası arasındakı əməkdaşlığın prioritet istiqamətləri ilə uyğun gəldiyini deyib. Bildirilib ki, layihə gənclərin səriştə və bacarıqlarını inkişaf etdirmək yolu ilə təhsil sisteminin əmək bazarının tələblərinə cavab verməsini təmin edir. Vurğulanıb ki, layihənin vətəndaş cəmiyyətini ölkənin sosial-iqtisadi inkişafı proseslərinə cəlb etməklə, dövlət və özəl sektoru bir araya gətirərək icra olunması xüsusilə əhəmiyyətlidir.
Sonra konfrans işini ADA Universitetinin prorektoru Fariz İsmayılzadənin moderatorluğu ilə “Gənclər arasında sahibkarlıq və maliyyə savadlılığı” mövzusunda panel müzakirələrlə davam etdirib. “Paşa Bank” ASC-nin korporativ bankçılıq və biznesin inkişafı şöbəsinin direktoru Aynurə Piriyeva, Azərbaycan Mikromaliyyə Assosiasiyasının icraçı direktoru Jalə Hacıyeva, BARAMA İnnovasiya və Sahibkarlıq Mərkəzinin baş direktoru İmran Bağırov və Azərbaycan Gənclərinin Nailiyyəti İctimai Birliyinin icraçı direktoru Sevinc Məmmədova təqdimatlarla çıxış ediblər.