MƏDƏNİYYƏT
“Gəncləşən muğam-5” layihəsi Azərbaycan Gəncləri Gününə gözəl bir töhfə olacaqdır VİDEO
Bakı, 17 yanvar (AZƏRTAC). Xəbər verdiyimiz kimi, Mədəniyyət və Turizm Nazirliyinin və Heydər Əliyev Sarayının birgə təşəbbüsü və təşkilatçılığı ilə reallaşan “Gəncləşən muğam” layihəsi davam edir.
Xalq Artisti, professor Mənsum İbrahimov ilə əməkdar artistlər - tarzən Elçin Həşimov və kaman ifaçısı Elnur Əhmədovun bu birgə layihəsi çərçivəsində fevralın 2-də Heydər Əliyev Sarayında “Gəncləşən muğam-5” adlı konsert keçiriləcəkdir.
Xalq Artisti, professor Mənsum İbrahimov AZƏRTAC-a müsahibəsində layihə haqqında geniş məlumat vermişdir. Bildirmişdir ki, layihəni ilk dəfə həyata keçirəndə tamaşaçılar və sənətkarlar tərəfindən çox maraq yarandığından onu davam etdirmək və hər il fevralın 2-də ənənəvi olaraq keçirilən Azərbaycan Gəncləri Gününə həsr etmək qərarına gəlinmişdir. Layihənin adı özündə yaşı min illərlə ölçülən muğam sənətinin gənclərin ifasında gəncləşdiyini əks etdirir.
Əgər ilk dəfə konsert yalnız tələbələrimizin iştirakı ilə təşkil olunmuşdusa, sonrakı illərdə layihənin əhatə dairəsi genişlənmiş, bu dəfə isə daha böyük miqyas almışdır. Yəni “Gəncləşən muğam-5” layihəsində 2005-ci ildən başlayaraq keçirilən 4 muğam müsabiqəsinin əsas qalibləri, diplomantları və sənətə yeni qədəm qoyan gənclər, beləliklə, tanınmış və tanınmamış ifaçılar, ümumilikdə 51 xanəndə iştirak edəcəkdir. İştirakçılar 12 yaşından tutmuş 35-36 yaşadək müxtəlif qrupları əhatə edəcəkdir. Həmçinin təkcə xanəndələr deyil, tar və kamança ifaçıları da onları müşayiət edəcəkdir. Bu həm də mənim sənət dostlarım olan əməkdar artistlər tarzən Elçin Həşimov və kaman ifaçısı Elnur Əhmədovun ideyasıdır. Hazırda onlar musiqiçilərlə işləyirlər.
Layihə çərçivəsində ərsəyə gələn konsertin hər dəfə fərqli formatda təqdim edildiyini deyən Mənsum İbrahimov bu dəfəki ifaların keçən ilki kimi duet, sırf konsert deyil, teatrlaşdırılmış kompozisiya şəklində təqdim olunacağını diqqətə çatdırmışdır.
Layihəyə Mədəniyyət və Turizm Nazirliyinin, Heydər Əliyev Sarayının dəstəyini vurğulayan görkəmli xanəndə Azərbaycan Dövlət Akademik Opera və Balet Teatrının baş rejissoru, konsertə Əməkdar İncəsənət Xadimi Hafiz Quliyevin quruluş verəcəyini qeyd etmişdir.
Bildirmişdir ki, layihə çərçivəsində biz həm yeni gənclərimizi tamaşaçılara təqdim edirik, həm də tanınmış xanəndələrin kompozisiya şəklində o ifaçılarla birləşib muğamlarımızdan kompozisiyalar qururuq. Konsertdə “Leyli və Məcnun”, “Aşıq Qərib”, “Əsli və Kərəm”, “Şah İsmayıl” operalarından da kompozisiyalar olacaqdır. Onları da biz sırf gənc ifaçılara vermişik. Aparıcılar da muğam parçalarına aid maraqlı fikirlər söyləyəcək, səhnə tərtibatı gözəl olacaqdır. Konsertdə Təbrizdən də xanəndə çıxış edəcəkdir. Hesab edirəm ki, konsert Azərbaycan Gəncləri Gününə gözəl bir töhfə olacaqdır.
Tanınmış xanəndə vurğulamışdır ki, Azərbaycanın birinci xanımı, Heydər Əliyev Fondunun prezidenti, UNESCO-nun və İSESCO-nun xoşməramlı səfiri, Milli Məclisin deputatı Mehriban Əliyevanın mədəniyyətimizin və incəsənətimizin, o cümlədən muğam sənətimizin təbliğində və tanıdılmasında müstəsna rolu vardır. Bu sahədə çalışan sənət adamlarına böyük dəstək və qayğı göstərilir. Azərbaycan beynəlxalq muğam festivallarına uğurla ev sahibliyi edir. Məhz bu çərçivədən, həmin layihənin davamı kimi konsertə beynəlxalq muğam festivalları münsiflər heyətinin üzvləri, ustad sənətkarlarımız, ziyalılarımız, müxtəlif peşə sahiblərini dəvət edəcək və gənclərimizi onlara təqdim edəcəyik. Belə tədbirlərdə hansısa bir gəncin yolu açılır, onun ifası kəşf edilir.
Mənsum İbrahimov demişdir: “Artıq məşqlər, eləcə də rəqabət başlamışdır. Ümid edirəm ki, nəticə yaxşı olacaqdır. Fürsətdən istifadə edib, tamaşaçıları fevralın 2-də Heydər Əliyev Sarayında reallaşacaq layihəni izləməyə dəvət edirəm”.
Layihənin digər müəllifləri olan əməkdar artistlər Elçin Həşimov və Elnur Əhmədov bildirmişlər ki, konsertdə Azərbaycan Milli Konservatoriyasının, eləcə də onun nəzdindəki musiqi kollecinin tələbələri, böyük sənətkarlarımızın tələbələri də çıxış edəcəklər. Xanəndələri 14 duet, yəni, tar və kamança ifaçıları müşayiət edəcəklər.
Məşqlərdə gənclərin rəqabəti və böyük məsuliyyəti hiss olunur. Rəqabət ondan irəli gəlir ki, hər kəs özünü səhnədə daha yaxşı göstərməyə çalışır. Məsuliyyətdən isə ondan irəli gəlir ki, onlar Ulu Öndərin adını daşıyan Heydər Əliyev Sarayında çıxış edəcəklər. Bu xoşbəxtlik isə hər sənətçiyə, ifaçıya nəsib olmur. Tamaşaçıların hər il konserti diqqətlə izləmələri bizi dəstəkləmələri isə ifaçılarımıza böyük ruh yüksəkliyi və güc verir.