ELM VƏ TƏHSİL


Genetik Ehtiyatlar İnstitutunun əməkdaşı Türkiyədə ağciyər xərçəngi ilə bağlı tədqiqat işi aparıb

Bakı, 16 aprel, AZƏRTAC

Azərbaycan Milli Elmlər Akademiyasının (AMEA) Genetik Ehtiyatlar İnstitutunun biotexnologiya şöbəsinin elmi işçisi Bayram Bayramov Türkiyədə ezamiyyətdə olub. O, ezamiyyətini Ege Universitetinin tibbi biologiya kafedrasında keçib.

İnstitutdan AZƏRTAC-a bildirilib ki, səfərin məqsədi “Ion PGM Yeni Nəsil Sekvenseri”nin iş prinsipini mənimsənilməsi, gen panellərinə görə amplikon sekvensləmənin həyata keçirilməsi və ayrı-ayrı xəstəliklər üzrə bu panellərin dizayn edilməsi, alınan məlumatların təhlili olub. B.Bayramov ezamiyyət çərçivəsində elmi rəhbəri tibb üzrə fəlsəfə doktoru, dosent Aslı Tetik Vardarlının rəhbərliyi altında qeyri-kiçik hüceyrəli ağciyər xərçəngi diaqnozu qoyulan xəstələrdə tədqiqat işi aparıb. Qeyd olunan xəstəlik ağciyər xərçənginin 85 faizini təşkil edir və bir çox növləri var (adenokarsinoma, yastı epitel hüceyrəli və böyük hüceyrəli).

Son dövrlərdə qeyri-invaziv metod kimi tanınan və getdikcə təkmilləşdirilən maye biopsiyası vasitəsilə xərçəng hüceyrələrinə aid DNT fraqmentlərini, eyni zamanda, qanda sərbəst dövr edən şiş hüceyrələrini əldə edib molekulyar səviyyədə tədqiq etmək mümkün hala gəlib. Tədqiqat zamanı bu üsul vasitəsilə xəstələrə aid olan plazma, bəd xassəli şiş toxuması və kondensasiya və nəfəsdən izolə edilmiş ümumilikdə 32 DNT nümunəsində 22 tumor supressor genin amplikon sekvensləməsi, eləcə də alınan sekvens datalarının “Ion Reporter” və “IGV” proqramlarında analiz edərək alınan nəticələrin onlayn “database”lərdə interpretasiyası həyata keçirilib.

Qeyd edək ki, tədqiqat işi TÜBİTAK tərəfindən dəstəklənir və 500 xəstə üzərində aparılması nəzərdə tutulan bu layihə “Ion Torrent” platformasında fəal şəkildə davam etdirilir.

B.Bayramovun tədqiqat işində yoğun bağırsaq xərçəngi diaqnozu qoyulan xəstələrdə maye biopsiyası metodundan istifadə etməklə şiş hüceyrələrinin genetik səviyyədə tədqiqi, onkogen və tumor supressor genlərdən ibarət hazır gen panellərindən istifadə edilməklə amplikon sekvenslənmə həyata keçirməklə mutasiyaların təyin edilməsi nəzərdə tutulur.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.