CƏMİYYƏT


Gömrük Akademiyası ilə Baş Prokurorluğun Elm-Tədris Mərkəzi birgə təlimlərə başlayıb

Bakı, 17 may, AZƏRTAC

Gömrük orqanlarının vəzifəli şəxslərinin peşəkarlıq səviyyəsinin yüksəldilməsini təmin etmək məqsədilə mayın 17-22-də Dövlət Gömrük Komitəsinin Akademiyasının (DGKA) və Baş Prokurorluğunun Elm-Tədris Mərkəzinin birgə təşkilatçılığı ilə “Gömrük işi sahəsində aşkar edilmiş cinayətlərin rəsmiləşdirilməsi xüsusiyyətləri və bu növ cinayətlər üzrə ibtidai araşdırma aparılmasının aktual aspektləri” mövzusunda onlayn birgə təlimlər keçirilir.

DGKA-dan AZƏRTAC-a bildirilib ki, təlimi giriş sözü ilə açan Baş Prokurorluğun Elm-Tədris Mərkəzinin rəisi Mübariz Əhmədov mərkəzlə Gömrük Akademiyası arasında yaranmış səmərəli və işgüzar münasibətlər, qarşılıqlı faydalı və ikitərəfli əməkdaşlığın genişləndirilməsi istiqamətində görülən işlər barədə məlumat verib. Bildirib ki, hazırkı birgə təlimlərə prokurorluğun və gömrük orqanlarının peşəkar, təcrübəli əməkdaşları təlimçi qismində cəlb edilib və bu tədbir gömrük orqanlarının təhqiqat və əməliyyat-axtarış fəaliyyəti sahəsində xidmət aparan əməkdaşları üçün peşə hazırlığının daha da yüksəldilməsi istiqamətində olduqca faydalı olacaq.

Gömrük Akademiyasının rəisi, gömrük xidməti general-mayoru Qulu Novruzov hər iki qurumun əməkdaşlarının peşəkar hazırlığının vacibliyini qeyd edərək akademiyada peşəkar bacarıqların aşılanmasına və formalaşmasına xidmət edən təlimlərin təşkil olunduğunu vurğulayıb. Q.Novruzov Gömrük Akademiyasının Baş Prokurorluğun Elm-Tədris Mərkəzi ilə keçirilən ilk tədbiri olduğunu qeyd edərək pandemiya ilə əlaqədar təlimlərin onlayn formatda keçirildiyini bildirib.

Dövlət Gömrük Komitəsi və Baş Prokurorluq arasındakı əməkdaşlıqdan söz açan akademiya rəisi iki qurumun çox faydalı və səmərəli əməkdaşlıq platformasının qurulduğunu deyib. Bu platformanın tədris sahəsində hər iki qurumun təlim-tədris mərkəzlərində, hər iki qurumun əməkdaşlarının peşəkar hazırlığının həyata keçirilməsinə məsul olan qurumların əməkdaşlığı çərçivəsində də inkişaf etdirilməsinin zəruriliyini nəzərə çatdırıb. Q.Novruzov gələcəkdə həm birgə təlim məzmunlarının hazırlanması, həm də təlim prosesinin səmərəli həyata keçirilməsi ilə bağlı uğurlu əməkdaşlıq formatı qurulacağına ümid etdiyini deyib.

O, təlimdə iştirak edən prokurorluq və gömrük əməkdaşlarına, həmçinin hər iki qurumun təlimçi qismində cəlb olunan əməkdaşlarına uğurlar arzulayıb.

Qeyd edək ki, təlimlərə cəlb olunan əməkdaşlara dərslər müəyyən edilmiş onlayn platforma üzərindən müvafiq cədvəl üzrə keçirilir. Tədris proqramı Baş Prokurorluğun Elm-Tədris Mərkəzi və Gömrük Akademiyası tərəfindən birgə hazırlanıb.

Təlimlər “Əməliyyat-axtarış tədbirləri və metodları, onların elmi-nəzəri, hüquqi əsasları, praktiki məsələləri və bəzi problemləri”, “Aşkar edilmiş hüquqpozma faktları üzrə foto və videoçəkilişdən istifadəyə dair qanunvericilikdən irəli gələn tələblər”, “Əməliyyat-axtarış tədbirlərinin təşkili və keçirilməsi ilə bağlı sənədlər, onlara verilən tələblər və nəticələrinin sənədləşdirilməsi”, “Aşkar edilmiş hüquqpozma faktları üzrə videoçəkilişdən istifadə metodikası”, “Əməliyyat-axtarış tədbirlərinin nəticələrinin cinayət mühakimə icraatında və digər istiqamətlərdə istifadə edilməsi” və digər mövzuları əhatə edən mühazirələr, mühazirə-təqdimatlar və praktiki məşğələlərdən ibarətdir.

Mühazirə və məşğələlər Gömrük Komitəsinin Əməliyyat-İstintaq Baş İdarəsi İstintaq və təhqiqat idarəsi Təhqiqat şöbəsinin rəisi Elnur Qurbanov, Əməliyyat-İstintaq Baş İdarəsi İstintaq və təhqiqat idarəsi İstintaq şöbəsinin rəisi İlkin Bağırov, Gömrük Akademiyasının “İxtisas fənləri” kafedrasının baş müəllimi Şahin Hüseynov və Baş Prokurorluğun Elm-Tədris Mərkəzinin, ədliyyə, gömrük və vergi orqanlarının istintaq, təhqiqat və əməliyyat-axtarış fəaliyyətində qanunların icrasına nəzarət idarəsinin məsul vəzifəli şəxsləri ilə birgə aparılır.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.