QAN YADDAŞI
Gömrük Akademiyasında Xocalı soyqırımının 28-ci ildönümünə həsr olunmuş anım tədbiri keçirilib
Bakı, 25 fevral, AZƏRTAC
Dövlət Gömrük Komitəsinin Akademiyasında Xocalı faciəsinin 28-ci ildönümünə həsr olunmuş anım tədbiri keçirilib. Xocalı soyqırımı zamanı həlak olanların xatirəsi bir dəqiqəlik sükutla yad edilib.
Gömrük Akademiyasından AZƏRTAC-a bildirilib ki, akademiyanın rəisi Qulu Novruzov Ermənistanın ölkəmizə qarşı işğalçılıq müharibəsinin gedişində 1992-ci il fevralın 25-dən 26-na keçən gecə dinc azərbaycanlı əhaliyə qarşı xüsusi amansızlıqla törədilmiş Xocalı soyqırımının Azərbaycan tarixinin qan yaddaşına çevrildiyini deyib. Azərbaycanlıların zaman-zaman öz dədə-baba yurdlarından deportasiya olunduğunu xatırladan akademiya rəisi vurğulayıb ki, bu soyqırımı təkcə bir gecədə baş verən cinayət deyil, 100 ildən çox tarixi əhatə edən dövrdə azərbaycanlılara qarşı başladılmış insanlıqdan uzaq ideologiyanın davamı idi.
Xocalı soyqırımının beynəlxalq aləmə tanıdılması ilə bağlı ümummilli lider Heydər Əliyev hakimiyyətə gəldikdən sonra ciddi addımlar atılmağa başlandığını deyən Q.Novruzov 26 fevralın Xocalı soyqırımının ildönümü kimi qeyd olunduğunu və bu həqiqətlərin bütün dünyaya çatdırılması üçün genişmiqyaslı tədbirlər keçirildiyini diqqətə çatdırıb.
Q.Novruzov Almaniyada keçirilən Münxen Təhlükəsizlik Konfransı çərçivəsində Ermənistan-Azərbaycan Dağlıq Qarabağ münaqişəsi ilə bağlı panel müzakirələrdə Prezident İlham Əliyevin Ermənistanın işğalçılıq siyasətini, Azərbaycanın ədalətli mövqeyini, Dağlıq Qarabağ regionunun əzəli Azərbaycan torpağı olduğunu tarixi faktlarla bir daha dünya ictimaiyyətinə çatdırdığını vurğulayıb.
Akademiya rəisi bu istiqamətdə Birinci vitse-prezident Mehriban Əliyevanın böyük işlər gördüyünü, onun rəhbərliyi ilə Heydər Əliyev Fondu tərəfindən müxtəlif xarici dillərdə çoxsaylı nəşrlərin hazırlanıb çap edildiyini vurğulayıb. Heydər Əliyev Fondunun vitse-prezidenti Leyla Əliyevanın təşəbbüsü ilə “Xocalıya ədalət!” beynəlxalq kampaniyasının aparıldığını xatırladan Q.Novruzov Xocalı soyqırımının həqiqətlərinin beynəlxalq miqyasda yayılması istiqamətində görülən işləri qeyd edib. Dövlətimiz tərəfindən bu istiqamətdə aparılan işlərin nəticəsi olaraq, İslam Əməkdaşlıq Təşkilatı Parlament İttifaqının ermənilərin Xocalıda törətdiyi mənfur əməlləri “insanlığa qarşı kütləvi cinayət”, eləcə də dünyanın bir çox ölkəsinin parlamentinin, ABŞ-ın 20-dən çox ştatının qanunverici orqanının Xocalı qırğınını soyqırımı aktı kimi tanıdığını bildirib.
Q.Novruzov bu işlərin davam etdirilməsinin vacibliyini vurğulayaraq, Azərbaycan həqiqətlərinin dünyaya tanıdılmasında gənclərin üzərinə böyük məsuliyyət düşdüyünü qeyd edib, gənclərə bu məsələnin mahiyyətinə varmağın vacibliyini bildirib.
Bakı Dövlət Universitetinin Azərbaycan tarixi kafedrasının dosenti, tarix elmləri namizədi Boran Əzizov Xocalı soyqırımında ermənilərin törətdikləri vəhşiliklərdən, soyqırımla bağlı tarixi faktlardan söz açıb. Həmin dövrü tarixi aspektlərdən təhlil edən natiq bu soyqırımının Azərbaycan xalqının müstəqilliyə çatmaq niyyətinin qarşısını almaq üçün həyata keçirildiyini bildirib.
Tədbirdə Xocalı soyqırımına həsr edilmiş videoçarx nümayiş olunub. Tədbir akademiyanın tələbələrinin ifasında Xocalıya həsr edilmiş ədəbi-bədii kompozisiya ilə sona çatıb.