İQTİSADİYYAT


Gömrük Komitəsi ilə Dünya Bankı arasında əməkdaşlıq əlaqələri genişləndirilir

Bakı, 19 fevral, AZƏRTAC

Özəl sektorun diaqnostikası çərçivəsində logistika sahəsinin qiymətləndirilməsi mövzusunda Dünya Bankının ekspertləri ilə onlayn görüş keçirilib.

Dövlət Gömrük Komitəsinin (DGK) Mətbuat və İctimaiyyətlə Əlaqələr İdarəsindən AZƏRTAC-a bildirilib ki, tədbirdə DGK sədrinin müavini, gömrük xidməti general-mayoru Cavad Qasımov, komitənin aidiyyəti qurumlarının nümayəndələri, Dünya Bakının eksperti Daniel Saslavski və bankın nümayəndələri iştirak edib. C.Qasımov Dünya Bankı ilə DGK arasında uzunmüddətli münasibətlərin qurulduğunu və səmərəli əməkdaşlığın daim inkişaf etdiyini bildirib. Prezident İlham Əliyevin rəhbərliyi ilə son illərdə həyata keçirilən islahatların gömrük orqanlarının kadr potensialının, maddi-texniki, normativ-hüquqi bazasının gücləndirilməsinə, ümumdünya gömrük sisteminə inteqrasiyasının beynəlxalq miqyasda gömrük əməkdaşlığının genişləndirilməsi və inkişaf etdirilməsinə münbit şərait yaratdığını diqqətə çatdıran komitə sədrinin müavini Azərbaycanda biznes mühitinin yaxşılaşdırılması istiqamətində həyata keçirilən tədbirlərin mütəmadi xarakter daşıdığını vurğulayıb. Dünya Bankının dəyərləndirmə alətləri və hesabatları üzrə göstəricilərin Azərbaycan üçün vacib əhəmiyyət daşıdığını bildirən C.Qasımov biznes mühitinin yaxşılaşdırılması istiqamətində həyata keçirilən tədbirlərin müsbət nəticə verdiyini diqqətə çatdırıb.

Komitə sədrinin müavini Azərbaycanda biznes mühitinin əlverişliliyinin artırılması məqsədilə xüsusi komissiya yaradıldığını və həmin qurumun tərkibindəki “Sərhəddə ticarət” işçi qrupunun Dövlət Gömrük Komitəsinin rəhbərliyi ilə fəaliyyət göstərdiyini bildirib.

Logistikanın və ticarətin inkişafı, o cümlədən bu sahədə həyata keçirilən layihələrdən danışan C.Qasımov logistik mərkəzlərin yaradılması, yeni gömrük buraxılış məntəqələrinin açılması və mövcud buraxılış məntəqələrinin infrastrukturunun genişləndirilməsi, o cümlədən nəqliyyat dəhlizlərinin rəqabət qabiliyyətliliyinin artırılması məqsədilə görülən işlər barədə də məlumat verib.

Dünya Bakının eksperti D.Saslavski təmsil etdiyi qurumla Dövlət Gömrük Komitəsi arasındakı əlaqələrdən məmnunluqla bəhs edib, görüşün keçirilməsi və özəl sektorun diaqnostikası məqsədilə təqdim olunan məlumatlara görə təşəkkürünü bildirib. D.Saslavski qarşılıqlı əlaqələrin daha da güclənəcəyinə və səmərəli əməkdaşlığın beynəlxalq ticarətin sürələndirilməsinə, biznes mühitinin daha da yaxşılaşdırılmasına töhfə verəcəyinə əminliyini ifadə edib.

Daha sonra görüşdə logistika sektorunun qiymətləndirilməsinin aparılması, özəl sektorun iqtisadiyyatda iştirak imkanlarının artırılması mövzusunda müzakirələr aparılıb.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.