CƏMİYYƏT
Gömrükçülər xarici valyutanın ölkədən qanunsuz çıxarılmasının qarşısını alıblar
Bakı, 27 aprel, AZƏRTAC
Dövlət Gömrük Komitəsinin Qərb Ərazi Baş Gömrük İdarəsinin əməkdaşları xarici valyutanın qanunsuz olaraq ölkə ərazisindən çıxarılması cəhdinin qarşısını alıblar.
Komitənin Mətbuat və ictimaiyyətlə əlaqələr idarəsindən AZƏRTAC-a bildirilib ki, Baş İdarənin “Qırmızı Körpü” gömrük postunda Azərbaycandan Gürcüstana gedən, həmin ölkə vətəndaşının idarə etdiyi “Mercedes Benz” markalı nəqliyyat vasitəsi saxlanılıb, sürücüsü şifahi sorğu sual olunub. Sorğu-sual zamanı sürücü idarə etdiyi nəqliyyat vasitəsində olan 9500 ABŞ dollarını gömrük nəzarətinə təqdim edib. Daha sonra nəqliyyat vasitəsinə baxış keçirilib. Yoxlama zamanı avtomobilin salonunda olan gödəkcənin cibində gömrük nəzarətindən gizlədilən 1 milyon 548 min rus rublu, vətəndaşın üzərindən isə 4000 ABŞ dolları aşkar edilib.
Faktla bağlı araşdırma aparılır.