CƏMİYYƏT
Goranboyda “Vətənin müdafiəsinə hazıram!” devizi altında tədbir keçirilib
Bakı, 21 fevral, AZƏRTAC
Xocalı faciəsinin 28-ci ildönümü ilə əlaqədar Səfərbərlik və Hərbi Xidmətə Çağırış üzrə Dövlət Xidməti (SHXÇDX) Goranboy Rayon İcra Hakimiyyəti ilə birgə “Vətənin müdafiəsinə hazıram!” devizi altında kütləvi tədbir keçirib.
Xidmətdən AZƏRTAC-a bildiriblər ki, rayon rəhbərliyinin, gənclərin, ictimaiyyətin, şəhid ailələri nümayəndələrinin, veteranların və hüquq-mühafizə orqanları rəhbərlərinin iştirakı ilə keçirilən tədbirin iştirakçıları ümummilli lider Heydər Əliyevin abidəsi önünə güllər düzüb, Xocalı qətliamı qurbanlarının xatirə kompleksini ziyarət ediblər.
Dövlət himninin ifası ilə başlayan tədbirdə respublikamızın suverenliyi və ərazi bütövlüyü uğrunda həlak olmuş şəhidlərin xatirələri bir dəqiqəlik sükutla anılıb.
Goranboy Rayon İcra Hakimiyyətinin başçısı Məhərrəm Quliyev gənc nəslin vətənpərvərlik ruhunda tərbiyəsi istiqamətində görülmüş işlərdən, qazanılmış uğurlardan danışıb. O, Prezident İlham Əliyevin qayğısı sayəsində gənclərin inkişafı məqsədilə hərtərəfli şəraitin yaradıldığını qeyd edib.
Səfərbərlik və Hərbi Xidmətə Çağırış üzrə Dövlət Xidməti rəisinin müavini, general-mayor Mayıl Şahverdiyev ötən əsrin sonlarında ölkəmizdə hərbi-siyasi şəraitin ağır dövründə xalqın tələbi ilə siyasi hakimiyyətə qayıdan ümummilli lider Heydər Əliyevin yorulmaz və qətiyyətli fəaliyyəti nəticəsində respublikamızın dövlət müstəqilliyinin qorunub saxlanıldığını diqqətə çatdırıb. Xidmət rəisinin müavini Azərbaycan Respublikasının Prezidenti, Silahlı Qüvvələrin Ali Baş Komandanı İlham Əliyevin rəhbərliyi altında davam etdirilən hərb quruculuğu siyasətindən, əldə edilmiş nailiyyətlərdən söz açıb.
General-mayor Mayıl Şahverdiyev 28 il əvvəl Ermənistan silahlı qüvvələrinin o zaman sovet ordusunun Xankəndidəki 366-cı motoatıcı alayının şəxsi heyətinin iştirakı ilə Azərbaycanın Xocalı şəhərinə hücum edərək, dinc azərbaycanlılara qarşı törətdikləri qanlı soyqırımı aktının ümumən bəşəriyyətə, insanlığa qarşı törədilmiş ən qatı cinayətlərdən biri kimi tarixə həkk olunduğunu bildirib. Xocalı soyqırımı ilə bağlı tarixi faktlar barədə beynəlxalq ictimaiyyətin dolğun şəkildə məlumatlandırılmasında Heydər Əliyev Fondunun vitse-prezidenti Leyla Əliyevanın təşəbbüsü ilə 2008-ci ildən başlanılan “Xocalıya ədalət!” beynəlxalq kampaniyası çərçivəsində görülmüş işlərdən danışılıb.
Şəhid Milli Qəhrəman Niyazi Aslanovun həyat yoldaşı Rübabə Aslanova Xocalı faciəsinin ermənilərin tarixən xalqımıza qarşı həyata keçirdikləri düşmənçilik siyasətinin bir hissəsi olduğunu bildirib. O, gəncləri tariximizi yaxşı öyrənməyə, düşmənlərimizi tanımağa çağırıb.
Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının üzvü Emin Həsənli Ermənistanın etnik düşmənçilik zəminində azərbaycanlılara qarşı soyqırımı həyata keçirməsinin beynəlxalq təşkilatlar, eləcə də xarici dövlətlər tərəfindən tanınması məqsədilə görülmüş işlərdən söz açıb.
Tədbirdə Xocalı və Goranboy rayon məktəbliləri arasında “Vətənin müdafiəsinə hazıram!” adı altında keçirilmiş inşa müsabiqəsinin qalibləri mükafatlandırılıb. Münsiflər heyətinin qərarına əsasən qalib elan olunan məktəblilərə diplomlar və mükafatlar təqdim edilib.
Sonda Naftalan şəhər İ.Nəsimi adına 1 saylı orta məktəbin şagirdləri vətənpərvərlik ruhunda hazırladıqları ədəbi-bədii kompozisiyanı təqdim ediblər. Tədbirdə hərbi orkestrin və hərbi-vətənpərvərlik mahnılarının ifaçısı Şəmistan Əlizamanlının çıxışları da böyük maraqla qarşılanıb.