REGİONLAR
Goranboyda suvarmada problemlərin yaşanmaması üçün ötən il 60 subartezian quyusu qazılıb VİDEO
Goranboy, 29 mart, AZƏRTAC
Əhalisinin böyük əksəriyyəti əkinçilik və maldarlıqla məşğul olan Goranboy rayonunda suvarmada problemlərin yaşanmaması üçün Prezident İlham Əliyevin tapşırığı əsasında ötən il 60 subartezian quyusu qazılıb və onlardan 52-si isə artıq istifadəyə verilib. Digər 4 quyu isə keçmiş təmas bölgəsinə yaxın kəndlərdə olduğu üçün işlər bir az yubansa da, hazırda qazma işləri davam etdirilir. Daha 4 quyuda son tamamlama işləri aparılır.
AZƏRTAC-ın bölgə müxbiri xəbər verir ki, əkinlərin suvarma suyu ilə təminatında problemin yaşanmaması üçün Goranboy rayon Subartezian Quyularının İstismarı İdarəsi tərəfindən lazımi tədbirlər görülür.
Fermerlər dövlətimizin başçısının tapşırığı əsasında yeni işə salınmış subartezian quyuları hesabına problemin aradan qalxmasından çox razı olduqlarını bildirirlər.
Qeyd edək ki, 2020-ci ildə Goranboy rayonu üzrə suvarılan 37500 hektar sahənin 32500 hektar sahəsi subartezian quyularından çıxarılan, 500 hektar sahə isə nasos stansiyalarından ötürülən su ilə suvarılıb.
Suvarılan sahələrin 2796 hektarı pambıq sahəsi olub ki, ondan da 9723 ton məhsul əldə edilib. Taxıl sahəsi üzrə suvarılan sahə isə 21430 hektar ərazini əhatə edib. Burada məhsuldarlıq 67700 ton taxıl olub.
Ötən il subartezian quyuları və nasos stansiyası üzrə 156 min kvt/s elektrik enerjisi sərf olunub və 34 milyon kub su çıxarılıb. Təmir olunan nasos sayı isə 638-dir, məhsuldarlığını itirmiş 10 quyu isə bərpa edilib.
Bu il 2 ədəd aqreqatın əsaslı təmiri, 895 ədəd subartezian quyusuna ehtiyat hissələrinin alınması, məhsuldarlığını itirmiş 8 quyuda isə yeni lülə qazıntıları ilə yanaşı, elektrik təsərrüfatının yenilənməsi, həmçinin quyu başlıqlarının betonlanması və ətrafın çəpərə alınması üzrə tender elan olunub.