Bakı, 20 oktyabr, AZƏRTAC

Oktyabrın 20-də Azərbaycan Dillər Universitetində (ADU) görkəmli bəstəkar, Xalq Artisti, Dövlət mükafatı laureatı Tofiq Quliyevin anadan olmasının 100 illiyinə həsr edilən “Azərbaycan musiqisi xəzinəsi” mövzusunda tədbir keçirilib.

ADU-dan AZƏRTAC-a bildirilib ki, Prezident İlham Əliyevin 2017-ci il 7 fevral tarixli Sərəncamına əsasən, universitetin “Auditoriya+” proqramı çərçivəsində azərbaycanşünaslıq elmi-tədqiqat laboratoriyasının və regionşünaslıq kafedrasının birgə təşkil etdiyi tədbirdə Tofiq Quliyevin musiqi mədəniyyətimizin inkişafındakı mühüm xidmətlərindən bəhs olunub.

Tədbirdə ADU-nun rektoru, akademik Kamal Abdulla görkəmli bəstəkarın həyat və yaradıcılığından, yüksək insani keyfiyyətlərindən söhbət açıb, onunla bağlı xatirələrini bölüşüb. Bildirilib ki, Tofiq Quliyev mahnıları ilə milyonlarla dinləyicinin qəlbini fəth etməyi bacarıb. Rektor deyib: “Ulu öndər Heydər Əliyev hər zaman klassiklərimizə, ustadlarımıza və müəllimlərimizə qiymət verib. Bu, hazırda Prezident İlham Əliyevin verdiyi qiymətlə üst-üstə düşür”.

K.Abdulla diqqətə çatdırıb ki, Tofiq Quliyev Azərbaycan xalqının qəlbinə təkcə sənəti və musiqisi ilə deyil, eyni zamanda, şəxsiyyəti ilə yol tapan görkəmli ziyalı olub. Bu gün bəstəkarın övladları və qohumları onun mənəvi davamçılarıdırlar. Təkcə görkəmli rejissor Eldar Quliyevin adını çəkmək kifayətdir. “Azərbaycan inkişaf etdikcə Tofiq Quliyev sənəti də sanki inkişaf edir, daxili dinamikasına köklənir. Bu gün də Tofiq Quliyev musiqisinə qulaq asanda riqqətə gəlirik”, - deyə rektor bildirib.

Azərbaycanın Xalq Artisti, kinorejissor və ssenarist Eldar Quliyev bəstəkarın həyat və yaradıcılığında şahid olduğu məqamlardan danışıb. Atasına göstərilən münasibətdən söhbət açan E.Quliyev deyib: “1997-ci ildə Tofiq Quliyevin 80 illiyinə həsr olunan yubiley mərasimində ulu öndər Heydər Əliyev bəstəkara xitabən bildirmişdi ki, vaxt gələcək hər şey dəyişəcək, yaddan çıxacaq, ancaq Tofiq Quliyev musiqisi yaşayacaq”.

Tədbirdə ADU-nun israilşünaslıq ixtisası üzrə təhsil alan ikinci kurs tələbəsi Şahverən Babayev “Nargilə” və “Pəri” mahnılarını ifa edib.

Sonda Azərbaycan Milli Konservatoriyası tərkibində Respublika İncəsənət Gimnaziyasının şagirdləri tədbirdə fəal iştiraklarına görə ADU-nun rəhbərliyi tərəfindən təşəkkürnamələrlə təltif olunublar.