CƏMİYYƏT
“Gözəllik” vitamini biotin
Bakı, 25 fevral, AZƏRTAC
B qrupu vitaminlərindən biri olan B7 vitamini biotin və ya H vitamini kimi də adlandırılır. Xüsusilə saç, dırnaq və dəri quruluşuna təsir etdiyinə görə ona “gözəllik” vitamini də deyirlər. Əsasən bağırsaqdakı bakteriyalar tərəfindən istehsal edilsə də, bir sıra qida məhsullarının da tərkibində rast gəlinir.
1901-ci ildə Belçika mikrobioloqu R.M.Uilders yumurta sarısının tərkibində maya göbələkciklərinin çoxalmasını sürətləndirən naməlum bir maddə aşkar edib və ona “bios”, yəni yunancadan tərcümədə həyat adı verib. 1935-ci ildə Niderland biokimyaçısı F.Kyeql maya göbələkciklərinin inkişaf amilini kristal şəklində əldə etməyə müvəffəq olub və həmin maddəyə biotin adı verib. Bu maddədən 1 milliqram almaq üçün tədqiqatçı 250 kiloqram qurudulmuş yumurta sarısından istifadə edib.
Bu barədə AZƏRTAC-a Azərbaycan Tibb Universitetinin Tədris Terapevtik Klinikasının Qəbul və təcili tibbi yardım şöbəsinin müdiri Cavanşir Məhərrəmov məlumat verib.
Klinikanın şöbə müdirinin sözlərinə görə, biotin həzm sisteminə zülallarla birləşmə şəklində düşür. Zülallar proteinazaların təsiri altında hidroliz olunduqdan sonra sərbəst hala keçən biotin nazik bağırsağın selikli qişa hüceyrələrinə sorulur. Buradan qana keçən biotin albuminlərlə kompleks birləşmə şəklində toxumalara çatdırılır. Onun əsas hissəsi qaraciyər və böyrəklərdə toplanır. Biotin dəyişikliyə uğramış şəkildə orqanizmdən sidik və nəcislə xaric edilir.
Biotin ərzaq maddələrinin tərkibində geniş yayıldığına və bağırsaqlarda bakteriyaların həyat fəaliyyəti sayəsində sintez edildiyinə görə təbii şəraitdə onun avitaminozuna təsadüf edilmir. Bu vitamin haqqında təsəvvürlərin yaranmasında və avitaminozun tədqiq edilməsində yumurta ağının tərkibində tapılan avidin zülalının böyük rolu olub. Bu zülala bütün quşların və sürünənlərin yumurtasında rast gəlinir.
B7 vitamininə gündəlik tələbat 150-200, hamiləlik dövründə isə 25-300 mikroqramdır. Bu miqdarın bir hissəsini insan bağırsaq bakteriyalarından alır. Bir hissəsi isə orqanizmə bəzi bitki və heyvan mənşəli qida maddələrinin tərkibində daxil olur. B7 vitamininə qaraciyər, soya, yumurta sarısı, balıq əti, quru noxud, gül kələmi, buğda ununun tərkibində rast gəlmək olar.