DÜNYA
Gürcüstanda Baş nazirin müavini və energetika naziri vəzifələrinə yeni təyinatlar olub
Tbilisi, 12 iyul, AZƏRTAC
Gürcüstan Hökumətinin tərkibində yeni təyinatlar olub. Baş nazirin müavini və energetika naziri vəzifələrinə yeni təyinatlar olub.
Gürcüstanın Baş naziri Georgi Kvirikaşvilinin sərəncamı ilə xarici işlər naziri Mixail Canalidze həm də, Baş nazirin müavini təyin olunub.
Baş nazir hökumətin bu gün keçirilən iclasında deyib ki, bu təyinatla biz, xarici siyasətimizin prioritetlərinə verdiyimiz yüksək qiyməti bir daha nümayiş etdirdik.
Gürcüstan xarici siyasət idarəsinin rəhbərinin ölkə ilə Avropa İttifaqı arasında münasibətlərin inkişafında və Avropa ölkələri ilə sadələşdirilmiş viza rejiminin tətbiqində böyük xidmətləri olub. M.Canalidze iqtisadiyyat nazirinin müavini postunda çalışarkən (2011-2015) Avropa ilə azad ticarət sazişinin imzalanmasında danışıqlar aparan Gürcüstan nümayəndə heyətinin rəhbəri olub.
Qeyd edək ki, Baş nazirin müavini, energetika naziri Kaxa Kaladzenin Tbilisi şəhərinin meri vəzifəsinə namizədliyi irəli sürüldükdən sonra o, vəzifəsindən istefa vermişdi.
Baş nazirin digər sərəncamı ilə energetika nazirinin müavini işləmiş İlya Eloşvili energetika naziri təyin olunub.
Xətayi Əzizov
AZƏRTAC-ın xüsusi müxbiri
Tbilisi