DÜNYA


Gürcüstanda bütün seçki məntəqələri prezident seçkilərinin ikinci turuna hazırdır

Tbilisi, 27 noyabr, AZƏRTAC

Gürcüstan prezident seçkilərinin ikinci turuna tam hazırdır. Bütün seçki məntəqələri tam hazırlıq vəziyyətinə gətirilib və səsverməyə hazırdır.

AZƏRTAC xəbər verir ki, bu barədə Gürcüstan Mərkəzi Seçki Komissiyasının (MSK) mətbuat katibi Anna Mikeladze bildirib.

A.Mikeladzenin sözlərinə görə, ölkə üzrə 3 min 703 və xarici ölkələrdə 55 seçki məntəqəsi yaradılıb.

Seçki bülletenləri dairə seçki məntəqələrinə çatdırılıb.

Bütün məntəqələr noyabrın 28-də yerli vaxtla səhər saat 8:00-da açılacaq və səsvermə başlayacaq. Səsvermə Gürcüstanda yerli vaxtla saat 20:00-da, xarici ölkələrdə isə saat 24:00-da başa çatacaq.

MSK-nın məlumatına görə, ümumi seçicilərin sayı 3 milyon 528 min 658 nəfərdir.

Səsvermənin gedişini seçici subyektlərinin 17 min nəfər nümayəndəsi, 48 min 500 yerli və 1300 beynəlxalq müşahidəçi izləyəcək.

Eyni zamanda, səsvermənin gedişini 2300 yerli və xarici mətbuat nümayəndəsi izləyəcək.

MSK rəsmisi bütün seçiciləri səsvermədə fəal olmağa çağırıb.

Məlumat üçün qeyd edək ki, Gürcüstanda prezident seçkilərinin ikinci turu noyabrın 28-də keçiriləcək.

İkinci turda müstəqil namizəd, hakim “Gürcü arzusu-demokratik Gürcüstan” partiyasının dəstəklədiyi Salome Zurabişvili və “Güc birlikdədir” birləşmiş müxalifət blokunun dəstəklədiyi Qriqol Vaşadze mübarizə aparacaqlar.

 

Xətayi Əzizov

AZƏRTAC-ın xüsusi müxbiri

Tbilisi

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.