İQTİSADİYYAT


Gürcüstandan Azərbaycana İtaliya çəyirtkəsinin kütləvi miqrasiyasının qarşısı alınıb

Bakı, 14 iyul, AZƏRTAC

Gürcüstandan Azərbaycana İtaliya çəyirtkəsinin kütləvi miqrasiyasının qarşısı alınıb.

Kənd Təsərrüfatı Nazirliyindən AZƏRTAC-a bildiriblər ki, Şəkinin Acınohur, İncə və Səbətli kəndlərinin ərazisində İtaliya çəyirtkəsinə (Calliptamus italicus) qarşı fitosanitar monitorinq həyata keçirilib və kütləvi sirayətlənmə aşkar olunmuş 417 hektar əkin sahəsində iyulun 5-də kimyəvi mübarizə tədbirlərlərinə başlanılıb.

Kənd Təsərrüfatı Nazirliyi yanında Dövlət Fitosanitar Xidmətinin yerli mütəxəssisləri tərəfindən aparılan mübarizə tədbirlərində Artst (0,3l/hektar) və Asetisuper (0,2kiloqram/hektar) insektisidlərindən istifadə edilib və yüksək bioloji səmərəlilik əldə edilib. İşçi məhlul kimi 200 litr su götürülüb. Vaxtında başlayan mübarizə nəticəsində meyvə bağları, qarğıdalı, tütün və bostan-tərəvəz sahələrinə vurulan ziyanın və İtaliya çəyirtkəsinin yumurta qoymaq mərhələsinin qarşısı alınıb.

Mübarizə tədbirləri iyulun 13-də başa çatıb.

Şəki Bitki Mühafizəsi Mərkəzi tərəfindən aparılan araşdırmalar zamanı çəyirtkələrin Gürcüstanın İori yaylasından Qax və Zaqatala rayonlarının arasındakı Qanıx və Alazan çayları vasitəsilə miqrasiya etdiyi müəyyən olunub.

İtaliya çəyirtkəsinin miqrasiyası axırıncı dəfə 2012-2014-cü illərdə baş verib.

Çəyirtkələr kütləvi çoxalan illərdə kənd təsərrüfatı bitkilərinə böyük ziyan vurur. Yovşan və yabanı dənli bitkilər olan çöllər, yovşanlı yarımsəhra yerlər və boş sahələr bu zərərvericilərin yaşayış yerləridir. Çöllərdə, qumlu və gilli torpaqlarda yumurta qoyurlar. Çünki belə torpaqları günəş yaxşı qızdırır.

Kimyəvi mübarizəni həmişə küləyin istiqamətinə perpendikulyar şəkildə, sahənin qurtaracağında başlamaq lazımdır. Mübarizə zamanı küləyin sürəti 5 metr/saniyədən çox olmamalı, traktorun hərəkət sürəti isə 7 kilometr/saat olmalıdır. Dərman preparatları kənarda həll edilib tökülməlidir.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.