MƏDƏNİYYƏT
Gürcüstanın dövlət büdcəsində Azərbaycan mədəniyyət ocaqları üçün nəzərdə tutulan vəsaitin məbləği artırılıb
Tbilisi, 1 dekabr, AZƏRTAC
Gürcüstan hökumətinin 2021-ci il üçün hazırladığı dövlət büdcəsində mədəniyyət ocaqları üçün nəzərdə tutulan vəsaitin həcmi xeyli artırılıb. Hökumət, eyni zamanda, ölkədə fəaliyyət göstərən və dövlət büdcəsindən maliyyələşdirilən Azərbaycan mədəniyyət ocaqları üçün nəzərdə tutulan vəsaitin də həcmini artırıb.
AZƏRTAC xəbər verir ki, ölkənin 2021-ci il üçün dövlət büdcəsinin parlamentə təqdim olunan yekun sənədə əsasən, Tbilisidəki Mirzə Fətəli Axundov adına Azərbaycan Mədəniyyəti Muzeyinə 64 min lari həcmində vəsaitin ayrılması nəzərdə tutulub. Bu məbləğ cari ildə ayrılan vəsaitdən 17 min lari çoxdur. Muzey 62 min larini əməkhaqları və digər xərclərin ödənilməsinə yönəldəcək, 2 min larini isə qanunla icazə verilən fəaliyyət əsasında əldə edə biləcək.
Heydər Əliyev adına Tbilisi Dövlət Peşəkar Azərbaycan Dram Teatrına isə gələn il 188,4 min lari vəsait ayrılacaq ki, bunun da 182,4 min larisi əməkhaqları və digər xərclərin qarşılanması üçün nəzərdə tutulub. Teatr il ərzində 6 min lari həcmində qanunvericiliyə uyğun fəaliyyət əsasında gəlir əldə etmək hüququna malik olacaq. İllik müqayisədə teatrın dövlət büdcəsindən maliyyələşdirilməsi 43,4 min lari həcmində artıb.
Xətayi Əzizov
AZƏRTAC-ın xüsusi müxbiri
Tbilisi