AZƏRTAC-ın xüsusi müxbiri xəbər verir ki, cərrahiyyə sahəsində yüksəkixtisaslı mütəxəssislərdən biri, Moskva şəhəri 79 nömrəli klinik xəstəxananın endoskopik plastik bərpa şöbəsinin müdiri, Ümumrusiya Endoskopiya Cərrahları Cəmiyyətinin həqiqi üzvü, həmvətənimiz Sabir Həbibov nəzəri və praktik təbabətdə əldə etdiyi nailiyyətlərə, o cümlədən “Bir günün stasionarının təşkilati modelində “Treyveks” aparatının köməyi ilə endoskopik transillüminativ flebektomiyadan istfadə olunması” işinə görə Moskva hökumətinin mükafatına layiq görülmüşdür.

Rusiyanın görkəmli həkimlərinə, o cümlədən Sabir Həbibova mükafatı və xatirə medalını təntənəli şəraitdə Moskvanın meri Yuri Lujkov təqdim etmişdir.

S.Həbibovun və onun həmkarlarının işi mükafat təqdim olunan 40 iş arasından seçilmiş praktik təbabətə dair 7 ən yaxşı iş sırasında idi. Həmvətənimiz Rusiyada ilk dəfə olaraq, venaların endoskopik kəsilməsi metodikasını tətbiq etmişdir. O, həmin metodikadan hələ 2000-ci ildə Hamburqda cərrahların konqresində iştirak edərkən xəbər tutmuşdu.

Əslən kəlbəcərli olan Sabir Həbibov Azərbaycan Dövlət Tibb İnstitutunu bitirmişdir. Bakıda Elmi Tədqiqat Eksperimental Təbabət İnstitutunda yeddi il işlədikdən sonra Moskvada SSRİ Tibb Elmləri Akademiyasının Ümumittifaq Onkoloji Elmi Tədqiqat Mərkəzinin aspiranturasına daxil olmuşdur.1981-ci ildə “Ağ ciyərin zirvəsi xərçənginin klinikası, diaqnostikası və müalicəsi” mövzusunda bu sahədə ilk namizədlik dissertasiyası müdafiə etmişdir. 1983-cü ildən Moskvadakı 79 nömrəli klinik xəstəxanada işləyir və praktik cərrahiyyə ilə məşğul olur.