HEYDƏR ƏLİYEV ADINA BAKI DƏRİN ÖZÜLLƏR ZAVODU GÜRCÜSTAN HÖKUMƏTİNİN SİFARİŞLƏRİNİ UĞURLA HƏYATA KEÇİRİR

Azərbaycan Respublikası Dövlət Neft Şirkətindən (ARDNŞ) AZƏRTAC-a bildirmişlər ki, Heydər Əliyev adına Bakı dərin özüllər zavodu Gürcüstanda quraşdırılması nəzərdə tutulan avtomobil və dəmir yolu körpülərində aşırımlı tikililər üçün elementlərin hazırlanması məqsədi ilə bir müddət əvvəl qonşu ölkədən aldığı sifariş əsasında işləri yekunlaşdırmaq üzrədir. Avtomobil körpüsünün aşırım elementlərinə aid olan sifariş üzrə 86 tonluq metal-konstruksiya işləri görülmüşdür. O cümlədən 6 ədəd 9 metrlik və 9 ədəd 15 metrlik aşırım elementi hazırlanmışdır. Elementlər zavodun müvafiq sexində rəngləndikdən sonra Gürcüstana yola salınmışdır. Dəmir yolu körpüsü üçün nəzərdə tutulan və ümumi çəkisi 83 ton olan aşırım elementlərinin hazırlanması üzrə işlər də uğurla davam etdirilir.