Martın 5-də Azərbaycan Respublikasının Prezidenti İlham Əliyev Heydər Əliyev adına Sarayda aparılacaq əsaslı təmir və yenidənqurma işləri ilə əlaqədar hazırlanmış layihə ilə tanış olmuşdur.

Mədəniyyət və turizm naziri Əbülfəs Qarayev məlumat verərək bildirdi ki, dövlətimizin başçısının “Azərbaycan teatr sənətinin inkişaf etdirilməsi haqqında” Sərəncamında göstərildiyi kimi, Heydər Əliyev adına Sarayın mühüm ictimai-siyasi, mədəni tədbirlərin təşkil edilməsi və həyata keçirilməsində əhəmiyyətini nəzərə alaraq, burada əsaslı təmir və yenidənqurma işləri aparılacaq, Saray müasir avadanlıqla təchiz ediləcəkdir. Bununla əlaqədar Türkiyənin “Pim Proje” şirkəti xüsusi layihə hazırlamışdır. Martın 15-dən Saray fəaliyyətini dayandıracaq, bir ay müddətində yenidən yoxlamalar aparıldıqdan sonra işə başlanacaqdır. “Aqrartikinti” Səhmdar Cəmiyyəti tərəfindən görüləcək işlər 2008-ci ilin sentyabrında başa çatdırılacaqdır.

Prezident İlham Əliyev əvvəlcə layihədə nəzərdə tutulan dəyişikliklərlə tanış oldu, Sarayın təmirdən sonrakı vəziyyətini göstərən şəkillərə baxdı.

“Pim Proje” şirkətinin rəhbəri Cəlal Özkan layihə barədə məlumat verərək, ulu öndər Heydər Əliyevin adını daşıyan Sarayın layihə işlərinin onlara həvalə olunmasına görə təşəkkür edərək dedi ki, bu, bizim üçün böyük fəxrdir. Layihədə binanın xaricində, ətrafında və daxilində görüləcək işlər nəzərdə tutulmuşdur. Binaya mərmər üzlük çəkiləcəkdir.

İLHAM ƏLİYEV: Gərək binanın xarici görünüşü çox gözəl olsun, müasir olsun.

CƏLAL ÖZKAN: İşıqlandırma sistemi tamamilə yenidən qurulacaq, İtaliyadan gətirilmiş xüsusi şüşələr quraşdırılacaq və beləliklə, 24 saat ərzində binanın üzərindən ekran kimi istifadə olunacaqdır. Bu, bizim layihəmizin əsasını təşkil edir. Binanın qarşısından keçən yolda nəqliyyat vasitələrinin dayandırılması üçün avtomat tipli xüsusi sədlər quraşdırılacaq və tədbirlər olan zaman bundan istifadə olunacaq və insanların qarşıdakı parkla əlaqəsi yaranacaqdır.

İLHAM ƏLİYEV: Yəni bütün insanlar buradan rahat keçə bilsinlər.

CƏLAL ÖZKAN: Binanın giriş hissəsinin hündürlüyünü bir metr qaldıracaq və işıqlandıracağıq. Xüsusilə tədbirlər gecə keçirildiyi üçün daha işıqlı olacaqdır.

ƏBÜLFƏS QARAYEV: Cənab Prezident, hazırda giriş hissənin hündürlüyü 3,5 metrdir. Biz bunu bir metr yuxarı qaldırmaqla daha yaraşıqlı edəcəyik.

İLHAM ƏLİYEV: Giriş hissədə neçə qapı olacaqdır?

ƏBÜLFƏS QARAYEV: 7-8 qapı idi, hamısı qalır.

İLHAM ƏLİYEV: Yəni, necə var idisə, elə də qalır.

CƏLAL ÖZKAN: Bəli, amma qapılar avtomatik açılıb-bağlanacaqdır. Görüləcək bütün işlərdə son texnologiyalar, Avropada istifadə olunan materiallar tətbiq ediləcəkdir. Bu bina memarlıq baxımından çox gözəldir. Hazırda 50-yə yaxın memar binada texniki araşdırmaları davam etdirir.

İLHAM ƏLİYEV: Demək olar ki, binanın xarici memarlığı dəyişməz olaraq qalacaqdır. Sadəcə olaraq, biz bunu müasirləşdirəcəyik və yeni texnologiyalar tətbiq olunacaqdır. Sanki yeni bir saray tikilir.

CƏLAL ÖZKAN: Cənab Prezident, tamamilə doğrudur.

ƏBÜLFƏS QARAYEV: Cənab Prezident, dövlət tədbirlərinin burada keçirilməsini nəzərə alaraq, ali və hörmətli qonaqlar üçün nəzərdə tutulan giriş hissədə, eləcə də VİP otaqlarda dəyişiklik ediləcəkdir. Sənətçilər üçün yer də müasirləşdiriləcəkdir. Burada ulu öndərin büstü də qoyulacaqdır.

CƏLAL ÖZKAN: Xüsusi şüşələrin üzərindən ekran kimi istifadə oluna bilər.

İLHAM ƏLİYEV: Bu şüşələrdən içəridə gedən tədbir göstərilə bilərmi?

CƏLAL ÖZKAN: Bəli, lazım olduqda göstərilir.

İLHAM ƏLİYEV: Yəni insanlar bayırdan da tamaşa edə bilərlər.

CƏLAL ÖZKAN: Bəli, xüsusilə mərhum Prezidenti anma günlərində, eləcə də xüsusi əhəmiyyət daşıyan tədbirlər zamanı insanlar salonu bayırdan seyr edə bilərlər.

İLHAM ƏLİYEV: O zaman yollar bağlanacaq, insanlar buradan keçirilən tədbirə baxacaqlar.

CƏLAL ÖZKAN: Hər bir işimizdə yenilik olacaqdır. Foyedə lazer fəvvarələr də yaradılacaqdır.

İLHAM ƏLİYEV: Burada döşəmə, divarlar, tavan - hər şey dəyişir.

CƏLAL ÖZKAN: Foyelərdə nəzərəçarpacaq dəyişikliklər ediləcəkdir. Saatlar, videoekranlar quraşdırılacaq ki, insanlar içəridə olanları seyr edə bilsinlər. Burada xüsusi oturacaqlar qoyulacaq, dizayna uyğun olaraq paltarların asılması üçün işıqlı qarderoblar quraşdırılacaqdır.

İLHAM ƏLİYEV: Hər yer işıqlı olmalıdır.

CƏLAL ÖZKAN: Cənab Prezident, Milli Məclisdə də yeni sistem quraşdırılmışdır. Burada da həmin sistem tətbiq olunacaqdır. Qapılar mərmər döşəmələrə uyğun olacaq, Sarayın kassaları da təmir ediləcək, binanın ümumi görünüşünə uyğunlaşdırılacaq və müasir vəziyyətə salınacaqdır. Səhnənin akustikasının daha da yaxşılaşdırılması üçün hazırda Türkiyənin Ortadoğu Texniki Universitetinin mütəxəssisləri bu istiqamətdə işləri tamamlamışlar. İndikindən yaxşı olacaqdır.

ƏBÜLFƏS QARAYEV: Cənab Prezident, mütəxəssislərlə görüş keçirmişik. Oturacaqlar eyni rəngdə olacaq, əlavə 15-ə yaxın yer artırılacaqdır. Əvvəllər səhnədə yerləşdirilmiş səs qurğuları üçün xüsusi otaqlar ayrılmışdır.

İLHAM ƏLİYEV: İndi burada nə qədər oturacaq var və nə qədər olacaqdır?

ƏBÜLFƏS QARAYEV: 2150 oturacaq var və 2165-ə çatdırılacaqdır.

CƏLAL ÖZKAN: Oturacaqlarda tamaşaçılara xüsusi qulaqcıqlar veriləcəkdir. Bütün dünyada bu sistemdən istifadə olunur. Onlar danışıqları tərcümə vasitəsilə istədikləri dildə dinləyə biləcəklər. Binanın bayır divarlarına üzlüklər xüsusi texnologiya əsasında vurulacaq və zəlzələyə davamlı, uzunömürlü olacaqdır.

Prezident İlham Əliyev Sarayın giriş və daxili qapılarının formasına, ABŞ, Yaponiya, Almaniya, İtaliya və Avstriyada istehsal olunan materialların nümunələrinə, binanın daxilində, xaricində, ön və arxa girişlərdə istifadə olunacaq qranit və mərmərin çeşidlərinə, akustika üçün nəzərdə tutulan vasitələrə baxdı. Binanın sütunlarının yoxlanılması üçün müvafiq tapşırıqlar verərək dedi ki, bu bina 30 ildən artıqdır tikilibdir. Düzdür, təməli möhkəmdir, amma yenə də yoxlamalıyıq. Çünki bu daşlar əlavə ağırlıq verəcəkdir.

Sonra Prezident İlham Əliyev Sarayın xarici və gecə görünüşünü əks etdirən videokadrlara baxdı, səhnəni, foyeləri gəzdi, səhnənin dizaynı, quraşdırılacaq işıqlandırma, isitmə və soyutma sistemi ilə maraqlandı. Dövlətimizin başçısına burada aparılacaq dəyişikliklərlə bağlı məlumat verildi, yeni ekskalatorların quraşdırılacağı da bildirildi.

Prezident İlham Əliyev binanın işıqlandırılması və digər işlərlə bağlı əlavə tövsiyə və tapşırıqlar verərək dedi ki, görüləcək bütün işlərdə dünyada mövcud olan ən müasir texnologiyalar istifadə olunmalıdır. Biz ilk növbədə, bu parkı abadlaşdırdıq, ulu öndərin abidəsi qoyuldu. Əvvəllər park çox bərbad vəziyyətdə idi. İndi çox gözəl olubdur. Biz gərək ətrafdakı binaları da təmir edək. Bura möhtəşəm bir kompleks olacaqdır. Ulu öndər bu binanı 1974-cü ildə tikdiribdir. Biz də buna yeni müasir həyat veririk. Biz Sarayı 2008-ci ilin payızınadək hazır etməliyik.