“Nyusuik” jurnalı yazır ki, ABŞ-ın sabiq prezidenti Bill Klintonun xanımı Hilları Klinton öz xatirələrinə görə ədəbiyyat tarixində rekord məbləğdə qonorar alacaqdır. “Simon ənd Şuster” nəşriyyat evi keçmiş birinci lediyə üst-üstə 8 milyon dollar ödəyəcəkdir, özü də o, avans olaraq, 2,85 milyon dolları bəri başdan almışdır. Yeri gəlmişkən, bütün tarix ərzində bu, ABŞ senatoruna birdəfəlik ödənən ən böyük məbləğdir. 

“Simon ənd Şuster” Hilları avqustda çıxmalı olan kitabı yazıb qurtara bilməməsi barədə şayiəni təkzib etmişdir və inandırır ki, kitabı bütünlüklə onun özü yazmışdır.

Ötən həftə nəşriyyatdakı mənbə bildirmişdir ki, “əlyazma hələ hazır deyil, halbuki artıq may ayında onu çapa göndərmək lazımdır”. Bununla əlaqədar, ilkin satış göstəriciləri çox aşağıdır. Bunu indiyədək kitabın adının olmaması da çətinləşdirir.

Bildirilir ki, Hilları Klinton nəşriyyatla müqaviləni 11 sentyabr terror aktlarından əvvəl imzalamışdır. O, ictimai işlərdə və xeyriyyəçilik fəaliyyətində yaxından iştirak etməli olduğundan kitabı tamamlaya bilməmişdir.

Sabiq prezidentin 23 yaşlı qızı Çelsi Klintona gəldikdə isə, Böyük Britaniyanın menecment sahəsində məsləhət-məşvərətlə məşğul olan iri firmalarından birində onu ayda 10 min dollar maaşla kiçik məsləhətçi işləmək üçün çox dilə tutmuşlar və nəhayət, o, razılıq vermişdir. Üstəlik, Çelsi məhz bu şirkətə işə girməyə razılıq verdiyinə görə, 10 min dollar məbləğində birdəfəlik mükafat almışdır.

Amerikanın tanınmış biznes məsləhətçisi Uilyam Dalkol “Vaşinqton post” qəzetinə bildirmişdir ki, firmanın qərarını “əla sərmayə” sayır, çünki Çelsi öz işində valideynlərinin əlaqələrinə arxalana bilər.

Lakin Çelsi Klinton bu yaxınlarda “McKinsey” şirkətinin London ofisində müsahibədə olmuş və ona Nyu-Yorkda ildə 40 min funt sterlinq maaşlıq vəzifə təklif edilmişdir.

Bundan əlavə, işə düzələrkən ona ən yaxşı şərtlərdən biri təklif olunacaqdır. Şərtlərdə Çelsinin illik gəlirini iki dəfə artıran bonuslar da nəzərdə tutulur.

Çelsi Klintonun işə götürülməsi “McKinsey” şirkəti üçün kifayət qədər uğurlu gediş ola bilər. Çelsi üçün isə istedadlı və əla təhsilli mütəxəssislərin çalışdıqları bu şirkəti karyerasının başlanğıcı üçün uğurlu yer hesab etmək olar.