İQTİSADİYYAT


H.Z.Tağıyev-Sumqayıt avtomobil yolunun 4 zolağa genişləndirilməsi işləri yekunlaşır VİDEO

Bakı, 5 avqust, AZƏRTAC

Respublika əhəmiyyətli Hacı Zeynalabdin Tağıyev - Sumqayıt avtomobil yolunun 4 zolağa genişləndirilməsi istiqamətində Azərbaycan Avtomobil Yolları Dövlət Agentliyi tərəfindən aparılan tikinti işləri yekunlaşdırılma mərhələsindədir.

Agentliyin İctimaiyyətlə əlaqələr şöbəsindən AZƏRTAC-a bildirilib ki, H.Z.Tağıyev–Sumqayıt avtomobil yolunun 4 zolağa genişləndirilən hissəsinin uzunluğu 13,7 kilometrdir. Tikinti işləri nəticəsində yolun mövcud eni 15 metrdən 23-26 metrə, hərəkət hissəsinin eni isə 7-10 metrdən 15 metrə qədər genişləndirilib.

Görülən işlər çərçivəsində marşrut boyu mövcud örtüyün sökülməsi, torpaq yatağının təbii relyef səviyyəsinə qaldırılması və genişləndirilməsi, yeni torpaq yatağının və yol əsasının inşası, geriyə dönmə hissələrin işlənməsi, yolun yaşayış məntəqəsi daxilindən keçən hissəsində piyada səkilərinin və yeni işıqlandırma sisteminin yaradılması, yolayrıcına dəmir-beton maneələrin düzülməsi işləri artıq yekunlaşıb.

Layihə üzrə nəzərdə tutulan və yolun 8-ci kilometrində layihələndirilən bir aşırımlı körpünün kənar dayaqlarının və beton aşırımların inşası, yolun digər hissəsində genişləndirilmə ilə əlaqədar kommunikasiya xətlərinin köçürülməsi işləri də artıq sona çatıb.

Bu işlərlə yanaşı, H.Z.Tağıyev-Sumqayıt avtomobil yolunda metal konstruksiyalı yeni piyada keçidinin inşası da yekunlaşıb. Vətəndaşların avtomobil yolunu rahat və təhlükəsiz keçməsini təmin etmək istiqamətində yerüstü piyada keçidi yolun 3,8-ci kilometrində inşa edilib. Keçidin uzunluğu 30 metr, eni isə 3,5 metrdir.

Hazırda layihə boyu son mərhələ üzrə yeni asfalt-beton örtüyünün döşənməsi işləri icra olunur.

Asfaltlanma işləri bitəndən sonra çiyin hissələrin bərkidilməsi, üfüqi nişanlanma xətlərinin çəkilişi, zəruri yol nişanlarının quraşdırılması ilə yol müasir görkəmdə istifadəyə veriləcək.

Görülən işlər “İnşaat Norma və Qaydaları”nın tələblərinə əsasən yüksək keyfiyyətlə agentliyin rəhbərliyinin nəzarəti altında aparılır. Layihənin nəzərdə tutulmuş müddət ərzində icra olunaraq yekunlaşdırılması üçün tikinti ərazisinə lazımi sayda qüvvə cəlb olunub.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.