REGİONLAR


Hacıqabulda 864 şagird yerlik bina əsaslı təmir edilib VİDEO

Hacıqabul, 16 sentyabr, Aydın Yavərzadə, AZƏRTAC

Hacıqabul şəhəri 5 nömrəli tam orta məktəb binasının əsaslı təmirdən sonra açılış mərasimi keçirilib.

AZƏRTAC-ın bölgə müxbiri xəbər verir ki, açılış mərasimində Təhsil Nazirliyinin Ümumi təhsilin təşkili və idarəolunması şöbəsinin əməkdaşı Firudin Həmzəyev, Hacıqabul Rayon İcra Hakimiyyətinin və rayon Təhsil Şöbəsinin əməkdaşları iştirak ediblər. Bildirilib ki, məktəb binası 1988-ci ildə fəaliyyətə başlayıb. Bir neçə dəfə cari təmir işləri görülsə də, son illərdə məktəb binasının əsaslı təmirə ehtiyacı olduğu üçün tikinti-bərpa işlərinə start verilib və 864 şagird yerlik məktəb binası əsaslı təmir olunub.

Ümumi sahəsi 5424 kvadratmetr olan bina 3 mərtəbədən ibarətdir. Binada 35 sinif otağı, 6 laboratoriya, 2 texnologiya, informatika, gənclərin çağırışaqədərki hazırlığı kabineti, məktəbəhazırlıq otağı, 120 yerlik akt zalı, 2 idman zalı, kitabxana və yeməkxana var. Məktəb binasının dayanıqlı enerji və istiliklə təmin olunması üçün qazanxana inşa edilib, transformatorla bərabər generator da quraşdırılıb. İçməli su təminatı üçün 1 ədəd 100 kubmetrlik su anbarı tikilib.

Yeni tədris ilində təhsil müəssisəsində 585 şagirdin, məktəbəhazırlıq qrupunda isə 47 uşağın təhsil prosesinə cəlb olunması planlaşdırılır. Məktəbdə peşə təmayüllü X sinfin yaradılması da nəzərdə tutulub. Təhsil müəssisəsində 42 nəfər pedaqoji, 13 nəfər texniki işçi çalışır.

Açılış mərasimində iştirak edən Təhsil Nazirliyinin Ümumi təhsilin təşkili və idarə olunması şöbəsinin əməkdaşı Firudin Həmzəyev bildirib ki, təhsil sahəsi hər zaman dövlətin diqqət mərkəzindədir. Bu istiqamətdə məqsədyönlü işlər aparılaraq yeni məktəbə binaları inşa olunur və ya əsaslı təmir edilir. Son illərdə 3000 məktəb binasında bu qəbildən olan işlər yerinə yetirilib və tam müasir standartlara uyğun olaraq istifadəyə verilib.

Qonaqlar məktəbdə yaradılan şəraitlə tanış olublar.

Qeyd edək ki, Hacıqabul rayonunda 30 tam orta, 3 ümumi orta olmaqla, ümumilikdə 33 ümumtəhsil müəssisəsi, 2 məktəbdənkənar təhsil müəssisəsi fəaliyyət göstərir.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.