REGİONLAR
Hacıqabuldakı sənaye məhəlləsinin 9 hektar sahəsində tikinti işləri başa çatıb
Hacıqabul, 7 fevral, Mahir Babayev, AZƏRTAC
2018-ci ildə Hacıqabul rayonunda ümumi məhsul buraxılışının həcmi əvvəlki illə müqayisədə 12,8 faiz artıb. Kənd təsərrüfatında 2,6 faiz, sənayedə 40,3 faiz, ticarətdə isə 6,4 faiz artım qeydə alınıb. Hesabat ilində pərakəndə əmtəə dövriyyəsi 12,8 milyon manat və ya 5,4 faiz, iaşə dövriyyəsi 5,3 faiz, əhaliyə göstərilmiş ödənişli xidmətlərin həcmi 5,9 faiz, məişət xidməti 4,9 faiz, yükdaşınmaların 2,3 faiz, sərnişindaşımanın 2,8 faiz, rabitə xidmətlərinin həcmi isə 10,2 faiz artıb. İl ərzində rayonda iqtisadiyyatın bütün sahələri üzrə əsaslı kapitala yönəldilən investisiyanın həcmi 27,5 faiz, istifadəyə verilmiş əsas fondlar isə 6,7 faiz çoxalıb.
AZƏRTAC-ın bölgə müxbiri xəbər verir ki, bu faktlar rayonda 2018-ci ilin yekunları və qarşıda duran vəzifələrə həsr olunan hesabat yığıncağında səsləndirilib.
Rayon icra hakimiyyətinin başçısı Əhməd Muxtarov deyib ki, Hacıqabulda iqtisadiyyatın əsasını təşkil edən kənd təsərrüfatında islahatların uğurla həyata keçirilməsi taxılçılığın və digər növ kənd təsərrüfatı məhsulları istehsalının artması ilə nəticələnib. Hər hektardan əldə edilən məhsuldarlıq da yüksəlib.
Qeyd olunub ki, rayonda hesabat ilinin məhsulu üçün 43 min 11 hektar sahədə taxıl əkilib, bunun da 31 min 848 hektarını buğda, 11 min 163 hektarını isə arpa əkini təşkil edib. Zəmilərdən 76 min ton məhsul əldə edilib. İstehsal olunan taxılın 42 min 344 tonunu buğda, 33 min 662 tonunu isə arpa təşkil edib. Məhsuldarlıq arpa bitkisi üzrə 30,1 sentner olub.
Bildirilib ki, ötən il rayonda 1300 hektar sahədə pambıq əkilib və plantasiyalardan 1172,7 ton məhsul yığılıb. İl ərzində sahələrdən 6 min 579 ton tərəvəz, 11 min 378 ton bostan, 495 ton kartof, 11 min 314 ton qarğıdalı, 6 min 520 ton şəkər çuğunduru, 40,9 ton soya, 11 min 995 ton meyvə, 268 ton üzüm yığılıb. Cari ilin məhsulu üçün 25 min 925 hektar sahədə buğda, 11 min hektar sahədə arpa, 353 hektar sahədə yonca və 321 hektar sahədə xəsil olmaqla ümumilikdə 37 min 607 hektar payızlıq əkin işləri həyata keçirilib.
Qeyd edilib ki, heyvandarlıq və quşçuluq sahəsində də nəzərə çarpacaq artım müşahidə olunub. Hesabat ilində 7 min 773 ton ət (diri çəkidə), 18 min 282 ton süd, 229 ton yun, 297 min 571 min ədəd yumurta istehsal edilib. Rayon üzrə iribuynuzlu heyvanların sayı 39 min 37, xırdabuynuzluların sayı isə 137 min 358 başa çatıb.
Yığıncaqda bildirilib ki, “Azərbaycan Respublikası regionlarının 2014-2018-ci illərdə sosial-iqtisadi inkişafı Dövlət Proqramı”nın icrası ilə əlaqədar hesabat dövründə rayonda mühüm layihələr həyata keçirilib. Rayon ərazisində tikinti-quraşdırma, abadlıq və yenidənqurma işləri davam etdirilib, abadlaşdırma işlərinin görülməsinə yerli büdcədən xeyli vəsait xərclənib.
Rayonun 19 min əhalinin yaşadığı, 10 yaşayış məntəqəsini birləşdirən 48 kilometrlik Qarasu-Abdulabad-Talış-Meyniman-Muğan və 11 min əhalinin yaşadığı, 3 yaşayış məntəqəsini birləşdirən 7,6 kilometrlik Nəvahi-Rəncbər-Pirsaat avtomobil yollarının tikintisi başa çatıb, Atbulaq kəndində “Hajigabul Greenhouse” MMC tərəfindən 17 hektar ərazinin 10 hektarında İspaniya texnologiyası ilə istixana tikilib istifadəyə verilib. İstixananın məhsul istehsalı gücü 1 hektar üçün 250-300 tondur. Kompleksdə 70 nəfər işlə təmin olunub.
Diqqətə çatdırılıb ki, rayonda 20 hektar sahədə Sənaye Məhəlləsi salınır, onun fəaliyyətinin təşkili və tənzimlənməsi “Azərbaycan İnvestisiya Şirkəti” ASC-yə həvalə olunub. Artıq Sənaye Məhəlləsinin 9 hektar sahəsində aparılan tikinti işləri başa çatıb, hazırda tikintidə tamamlama və abadlaşdırma işləri aparılır.
Vurğulanıb ki, gələcəkdə də nailiyyətlərin sayını artırmaq məqsədilə hazırda rayonda bir sıra tədbirlər həyata keçirilir. Torpaqların suvarma suyu ilə təmin olunması üçün sututarlar yaradılır, yeni kanallar çəkilir.
Yığıncaqda rayonda elektrik enerjisi təchizatının, əhalinin suya olan tələbatının yaxşılaşdırılmasından, təhsil, səhiyyə, mədəniyyət və sosial sahələrdə görülən işlərdən də bəhs olunub.