CƏMİYYƏT


Hadrutun azad edilməsi ordumuzun Vətən müharibəsində keçirdiyi ən uğurlu hərbi əməliyyatlardan biridir

Bakı, 9 oktyabr, AZƏRTAC

Oktyabrın 9-da Hadrut qəsəbəsinin işğaldan azad olunması Cəbrayıl rayon mərkəzinin və Cəbrayıl rayonu ilə Hadrut arasındakı bir neçə kəndin düşməndən təmizlənməsindən sonra mümkün oldu. Hadrutun azad edilməsi Ordumuzun Vətən müharibəsində keçirdiyi ən uğurlu hərbi əməliyyatlardan biri hesab olunur.

Bunu hərbi ekspert Ədalət Verdiyev AZƏRTAC-a müsahibəsində deyib.

Hərbi ekspert bildirib ki, qəsəbənin azad edilməsindən iki gün əvvəl Azərbaycanın Xüsusi Təyinatlı Qüvvələri düşmən müdafiəsinin boşluqlarından istifadə edərək onun arxasına keçib, Hadrutun ətrafında yerləşən yüksəkliklərdə mövqe qurublar. Ermənistan silahlı qüvvələri bundan cəmi bir gün sonra xəbər tutmuşdular. Onlar xəbər tutduqdan sonra isə oktyabrın 8-də səhər saatlarından Hadrut üzərinə hücum başlamışdı. Hücum zamanı həmin yüksəkliklərdə yerləşən xüsusi təyinatlılarımız həm artilleriyanı, həm pilotlu və pilotsuz aviasiyanı düşmən hədəflərinə, mövqelərinə atəşin nizamlanması tapşırıqlarını uğurla yerinə yetiriblər.

Ədalət Verdiyev vurğulayıb ki, Hadrutda erməni yalanlarına inanan yerli əhali vaxtında oradan çıxmamışdı. Lakin Azərbaycan tərəfi oradakı mülki əhalinin təhlükəsizliyinə kifayət qədər həssaslıqla yanaşaraq, onların təhlükəsiz şəkildə ərazidən çıxması üçün şərait yaratdı. Hadrutun işğaldan azad edilməsinin bir çox mühüm əhəmiyyəti var idi. Onlardan biri o idi ki, Hadrut Qarabağın dağlıq hissəsinə aiddir və dövlət müstəqilliyimizin bərpasından sonra Azərbaycan əsgərinin ayağı Hadrut azad olunanadək o torpaqlara dəyməmişdi. Digər tərəfdən, Hadrut üzərində son otuz ildə ilk dəfə Azərbaycan bayrağı məhz oktyabrın 9-da dalğalandı.

“Əslində düşmən Hadrut istiqamətində Azərbaycan Ordusunun hücumunu gözləmirdi. Cəbrayılın azad olunmasından sonra artıq ordumuzun hissə və bölmələri Füzuli rayonunun Əbdürrəhmanlı kəndində yerləşməklə mövqelərini həmin rayonun mərkəzinin üç kilometrinədək irəlilətməyi bacarmışdı. Belə olan halda düşmən əsas qüvvələrini Füzuli istiqamətində cəmləşdirmişdi. Amma bu, o demək deyildi ki, Hadrut tərəfi tamamilə boş qalmışdı. Bu, Ordumuzun bilərəkdən atdığı addım idi. Füzuli istiqamətinə düşmənin mühüm qüvvələrini cəlb edərək və əsas zərbəni Hadrut istiqamətinə endirərək mühüm yüksəklikləri ələ keçirməklə həm Şuşaya gedən yol, həm Füzuli, Zəngilan, Qubadlı, həm də Xocavənd istiqamətlərində ordumuzun hücumlarını genişləndirmək üçün Hadrut qəsəbəsinin ətrafındakı yüksəkliklərdən platsdarm kimi istifadə olunması çox vacib idi”, - deyə hərbi ekspert əlavə edib.

Ə.Verdiyev bildirib ki, düşmənin çoxlu sayda texnikasını məhv edən Ordumuz müxtəlif texnikalar ələ keçirməklə ondan sonrakı döyüşlərdə işğalçı orduya qarşı istifadə etdi. Hadrutun azad edilməsi Ordumuzun hücum əməliyyatları zolağını kifayət qədər genişləndirməsi ilə nəticələndi. Cəbrayıl, Füzuli, Xocavənd rayonlarında hücumun sürəti artdı. Qüvvələrimizin bir hissəsini isə Tuğ, Çanaqçı, Sığnaq, Daşaltı, Şuşa istiqamətinə yönləndirə bildik. Bu döyüş əməliyyatlarının ermənilərin qeyd-şərtsiz iddia etdiyi Qarabağın dağlıq hissəsinə daxil olan ərazinin Azərbaycanın nəzarətinə keçməsi Ermənistanın uydurduğu “Arsax” və “böyük Ermənistan” layihələrinin aradan qalxması ilə nəticələnəcəyi artıq şübhə doğurmurdu. Məhz Hadrutun azad edilməsi xalqımızın yalnız ətraf rayonları deyil, o cümlədən Qarabağın dağlıq hissəsinin də azad edilməsi uğrunda döyüşlərə və bu döyüşlərin qələbə ilə nəticələnəcəyinə ümidini artırdı”.

Ekspert qeyd edib ki, döyüş meydanında Ordumuzun qarşısında duruş gətirə bilməyən düşmən Azərbaycanın ətraf rayonlarını, mülki əhalinin yaşadığı əraziləri atəşə tuturdu. Lakin Azərbaycan xalqı bu zərbələrdən və itkilərdən sarsılmadı. Əksinə, xalqımız Prezidentimizin ətrafında daha sıx birləşdi, sarsılmaz birlik nümayiş etdirdi. İstər ölkə daxilindən, istərsə də xaricdən göndərilən məktub və müraciətlərdə müharibənin tam Qələbə əldə olunana qədər davam etməsi üçün müraciət olunurdu.

“Hadrutun azad edilməsi və orada yerləşən təminat-təchizat bazasının Azərbaycan Ordusunun nəzarətinə keçməsi cənub istiqamətindəki Ermənistan qoşunlarının ehtiyat silah-sursatla təchizatında problemlər yaratmağa başladı. Ümumiyyətlə, Hadrutun Azərbaycan Silahlı Qüvvələrinin nəzarətinə keçməsi Ermənistan cəmiyyətində çalxalanma yaratdı. Digər tərəfdən, bu, Ermənistan ordusunun cəbhənin digər istiqamətlərində müqavimət gücünün zəifləməsinə və ordumuzun həmin əraziləri daha az itki və yüksək sürətlə azad etməsinə şərait yaratdı”, - deyə Ə.Verdiyev vurğulayıb.

 

 

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.