REGİONLAR


Hamdullah Çuvalcı: I Beynəlxalq Tibbi Forum birgə layihələrin icrası üçün də geniş imkanlar açır

Naxçıvan, 21 iyun, Rauf Kəngərli, AZƏRTAC

“Bir millət, iki dövlət” olan Azərbaycan ilə Türkiyə arasında bütün sahələrdə əməkdaşlıq əlaqələri genişlənir. Bu əlaqələr ali təhsil müəssisələri arasında da möhkəmlənir, yeni mərhələyə yüksəlir. Bu baxımdan I Beynəlxalq Tibbi Forum çərçivəsində Naxçıvan Dövlət Universiteti ilə Qara Dəniz Texnik Universiteti arasında birgə əməkdaşlığa dair memorandumun imzalanması gələcək uğurlarımızın təminatçısıdır.

Bu sözləri AZƏRTAC-ın Naxçıvan bürosuna müsahibəsində Qara Dəniz Texniki Universitetinin rektoru, professor Hamdullah Çuvalcı deyib.

Rektor bildirib ki, Naxçıvan Dövlət Universiteti ilə yaratdığımız qarşılıqlı, faydalı tərəfdaşlıq əlaqələrinin genişləndirilməsi və inkişaf etdirilməsi yaxın gələcəkdə universitetlərimizin beynəlxalq imicinin güclənməsinə və xarici əlaqələrin yüksələn xətlə inkişafına təkan verəcək. Əlbəttə ki, bütün bunlardan qazanan isə həm muxtar respublikanın elmi və təhsili, həm də Türkiyə Respublikasının ali təhsil ocaqları, təhsil strategiyası olacaq.

Hamdullah Çuvalcı qeyd edib ki, rəhbərlik etdiyi ali təhsil ocağı Türkiyənin ən qədim universitetlərindən biridir və texniki sahədə kadr hazırlığını uğurla reallaşdırır. 30 minə yaxın tələbə sayı ilə Türkiyənin ən önəmli universitetləri sırasında olan Qara Dəniz Texnik Universiteti Türkiyədə İstanbuldan sonra mühəndislik sahəsində təhsilin verildiyi ilk ali təhsil ocaqlarındandır.

I Beynəlxalq Tibbi Forumun əhəmiyyətini də vurğulayan rektor bildirib ki, dünyanın səkkiz ölkəsindən gələn iştirakçılar forum çərçivəsində qarşılıqlı təcrübə mübadiləsi aparmaq, tibb elmində əldə edilən yenilikləri bir-biriləri ilə paylaşmaq imkanı əldə etdilər. Türkiyənin və Azərbaycanın tibb elmi sahəsində tanınmış elm xadimlərini bir araya gətirən tədbirdə təşkilatçılıq da yüksək səviyyədə idi. Forumda iştirak etmək gələcəkdə birgə layihələrin icrası üçün geniş imkanlar açır. Tibbin inkişafında əsas məsələlərdən biri də avadanlıq təminatıdır. Tibbi avadanlıqların istehsalı, bu sahədə yerli mütəxəssis hazırlığı qarşıda duran əsas vəzifələrdəndir. Qara Dəniz Texnik Universitetində tibbi avadanlıqların istehsalı ilə bağlı mühüm layihələr həyata keçirilir. Forum bu sahədə də əməkdaşlığın inkişafı baxımından əhəmiyyətlidir.

Hamdullah Çuvalcı deyib: “Mənim Naxçıvanla bağlı kifayət qədər təəssüratım var. Amma real şəkildə gəlib görmək, bu gözəlliyə əyani şəkildə tamaşa etmək çox fərqli bir hissdir. Bu diyarın insanları da tamam fərqli bir cazibəyə malikdirlər. İstər milli mətbəx nemətləri olsun, istər tanıdığım, münasibətdə olduğum insanlar olsun, mənə çox xoş təsir bağışlayır. Məhz bunun nəticəsidir ki, Naxçıvan şəhəri bir çox müsbət keyfiyyətlərinə görə liderdir. Hesab edirəm ki, ilk tibbi forumun bu şəhərdə keçirilməsi də təsadüfi deyil. Naxçıvandan qayıtdıqdan sonra həmvətənlərimizə burada bizlər üçün yaradılan şərait barədə ətraflı məlumat çatdıracağıq. İnanıram ki, bizim Naxçıvanla, naxçıvanlılarla istər təhsil, istərsə də digər sahələrdəki əməkdaşlığımız daha da inkişaf edəcək. Bizə göstərilən diqqətə görə isə Naxçıvan Muxtar Respublikası Ali Məclisinin Sədri Vasif Talıbova minnətdarlığımı bildirirəm”.

 

 

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.