Bakı, 16 iyun, AZƏRTAC

Azərbaycan Milli Elmlər Akademiyasının (AMEA) Nizami Gəncəvi adına Ədəbiyyat İnstitutunda Yaponiyanın Azərbaycandakı səfiri Cuniçi Vada ilə görüş keçirilib.

Bu barədə AZƏRTAC-a institutdan məlumat verilib. Bildirilib ki, görüşdə AMEA-nın vitse-prezidenti, Ədəbiyyat İnstitutunun baş direktoru akademik İsa Həbibbəyli 2012-ci ildə Yaponiyaya səfərindən və qarşılıqlı əməkdaşlıqdan danışıb. Tokiodan əlavə Xirosimada olduğunu da xatırladan akademik İsa Həbibbəyli həmin şəhərin Ağdamla oxşar taleyindən söz açıb: “Xirosimadakı dəhşətin səviyyəsini oradakı videolentdən görmək olur. Ağdamdakı erməni vəhşiliklərini isə əyani görmək mümkündür. Hər ikisi bəşəriyyət üçün böyük fəlakətdir. Xirosimada yandırılmış torpaqlarla yanaşı, yeni park salınıb və yaponlar həmin parkın adını “Sülh” qoyub. Azərbaycan da müharibə bitəndən sülh müqaviləsinin bağlanmasını istəyir”.

Ölkəmizdə Yaponiyaya böyük maraq, hörmət və ehtiramın olduğunu qeyd edən akademik Naxçıvan Dövlət Universitetinin rektoru olduğu zaman Yaponiya universitetləri ilə əməkdaşlıq əlaqələrinin qurulduğunu, hazırda bu əlaqələrin yüksək səviyyədə davam etdiyini diqqətə çatdırıb: “Arzu edirik ki, əlaqələr akademiya səviyyəsində də inkişaf etsin. İstəyirik ki, böyük Azərbaycan yazıçısı Cəlil Məmmədquluzadənin hekayələr kitabını yapon dilində çap edək. Mən Cəlil Məmmədquluzadə haqqında doktorluq işi və çoxlu kitablar yazmışam. İndiyə qədər onun əsərlərini 11 xarici ölkədə çap etdirmişik. Biz Haruki Murakamini tanıdığımız kimi, yapon oxucusunun da Cəlil Məmmədquluzadəni tanımağını əhəmiyyətli sayırıq. Sizin gəlişiniz Azərbaycan-Yaponiya əlaqələrinin inkişafına dəstəyinizi ifadə edir”.

Akademik İsa Həbibbəyli institutun Azərbaycan-Asiya ədəbi əlaqələri şöbəsinin əməkdaşı Gülnar Yunusovanın dünya ədəbiyyatı (yapon ədəbiyyatı) ixtisası üzrə “Haruki Murakaminin yaradıcılığında postmodernizm” mövzusunda filologiya üzrə fəlsəfə doktoru elmi dərəcəsi almaq üçün dissertasiya yazdığını, eləcə də Naxçıvan Dövlət Universitetindən Xumar Məmmədovanın da Azərbaycan-Yaponiya ədəbi əlaqələri mövzusunda doktorluq işi yazdığını diqqətə çatdırıb. Qeyd edib ki, Gülnar Yunusova yapon dilini öyrənib. Yapon ədəbiyyatını tədqiqi ilə yanaşı, yapon ədəbiyyatından tərcümələr də edir.

Səfir Cuniçi Vada dəvətə və Yaponiya-Azərbaycan əlaqələrinin inkişafı ilə bağlı dediyi xoş sözlərə görə akademik İsa Həbibbəyliyə təşəkkür edib. Qeyd edib ki, Yaponiya-Azərbaycan əlaqələri həm siyasi, həm iqtisadi, həm də mədəni sahədə inkişaf etməkdədir. “Bu il Yaponiya-Azərbaycan diplomatik əlaqələrinin 30-cu ildönümünü qeyd edirik. Belə bir zamanda Gülnar xanımın hazırladığı tədqiqat işi ədəbi əlaqələrin inkişafına töhfə verəcək. İki ildir ki, Azərbaycandayam, yaponlarla azərbaycanlılar arasında ortaq cəhətlər çoxdur. Sevinirəm ki, burada iştirak edib öz dəstəyimi göstərə bilirəm”, - deyə səfir bildirib.

Rəsmi görüşdən sonra Gülnar Yunusovanın tədqiqat işinin müdafiəsi keçirilib.