CƏMİYYƏT


“Hasepost” portalı Azərbaycanda zubr balasının doğulmasından yazır

Budapeşt, 19 yanvar, AZƏRTAC

“Hasepost” internet portalında dərc edilən məqalədə ötən il noyabrın 30-da Azərbaycanın Şahdağ Milli Parkında zubr balasının doğulmasından söz açılır.

AZƏRTAC xəbər verir ki, yazıda ana zubrun Avropada flora və faunanın qorunub saxlanılması proqramı çərçivəsində bir neçə il öncə Berlin zooparkına gətirildiyi və 2019-cu ilin may ayınadək burada saxlanıldığı bildirilir. Qeyd olunur ki, ana zubr iki il davam edən hazırlıq işlərindən sonra 2019-cu ilin mayında digər üç zubrla birlikdə Şahdağ Milli Parkına köçürülüb. Zubrlar 300 hektarlıq ərazidə saxlanılır, lakin yaxın vaxtlarda sahəni əhatəyə alan hasar götürüləcək və onlar Milli Parkın 130 min hektarlıq ərazisinə sərbəst çıxa biləcəklər.

Diqqətə çatdırılır ki, 2020-ci ilin payızında Azərbaycana əlavə olaraq daha beş zubr göndəriləcək. Azərbaycanın Ekologiya və Təbii Sərvətlər Nazirliyi, Ümumdünya Vəhşi Təbiəti Mühafizə Fondu (WWF), IDEA İctimai Birliyi, Avropanın nəsli kəsilmək üzrə olan heyvan növləri proqramı/Avropa Zoopark və Akvariumları Assosiasiyası və Berlin zooparkının birgə əməkdaşlığı çərçivəsində həyata keçirilən proqram 1927-ci ildə Qafqazda nəsli kəsilmiş zubrların öz təbii yaşayış zonasına qaytarılmasına mühüm töhfə verir.

 

Pərvanə Qarayeva

AZƏRTAC-ın xüsusi müxbiri

Budapeşt

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.