CƏMİYYƏT


Həmyerlimiz nadir avtomobil nüsxəsi ilə Avstriyada retro avtomobillərin festivalında iştirak edib

Vyana, 16 sentyabr, AZƏRTAC

Avstriyada yaşayan həmyerlimiz və retro avtomobillər həvəskarı Ramis Mirzəyev növbəti uğura imza atıb.

AZƏRTAC xəbər verir ki, Vyana Şəhər Merinin Prizi uğrunda keçirilən Payız Klassika Turunda öz retro avtomobili ilə iştirak edən həmyerlimiz 250-dək rəqibi arasında birinciliyi əldə edib.

Tarixi Avtomobillər üzrə Avstriya Cəmiyyətinin Vyana Şəhər Meriyası ilə birgə təşkil etdiyi turun proqramı nəqliyyat vasitələrinin texniki sazlığının yoxlanması, şəhərin mərkəzi küçələri ilə tur-parad, Vyanadan 80 kilometr məsafədə yerləşən qədim Roma dövrünə aid Karnuntum şəhərinə səfər və Vyana Şəhər Meriyasına geri dönüşdən ibarət olub.

Müsabiqədə qiymətləndirmə retro avtomobillərin texniki vəziyyəti, orijinal detallara sadiq bərpası, müvafiq məsafələri əvvəlcədən təyin edilmiş zaman çərçivəsində qət etməsi və digər parametrlər əsasında aparılıb.

Qeyd edilməlidir ki, 2016-cı ildən retro avtomobillər üzrə müxtəlif müsabiqə və festivallara qatılan R.Mirzəyev öz avtomobili ilə bir neçə mükafat da qazanıb. Həmyerlimiz təkcə nadir retro avtomobilin sahibi deyil, eyni zamanda, həmin avtomobili öz qarajında uzun sürən zəhmət nəticəsində orijinal vəziyyətinə gətirərək bərpa edib. Onun “təkərlər üzərində muzey” adlandırılan bu avtomobillərə sevgisi, texniki biliyi, avtomobilə göstərdiyi düzgün qayğı və peşəkar səriştəsi müsabiqələrdə ön sıralarda yer tutmasını təmin edir.

İxtisasına görə aviasiya sahəsində çalışan R.Mirzəyev hələ uşaqlıqdan avtomobillərə həvəs göstərib, hətta 16 yaşlı yeniyetmə olarkən müxtəlif ehtiyat hissələrindən 2 yerlik avtomobil də düzəldib. Bu istək onu heç zaman tərk etməyib və R.Mirzəyev həmişə yenidən təmir edilərək istifadəyə yararlı hala gətirilməsi mümkün olan qeyri-adi retro avtomobil axtarışında olub. Belə bir avtomobili 2010-cu ildə əldə edən həmyerlimiz uzun zəhmətdən sonra bütün detallarını orijinal vəziyyətdə saxlamaqla 1922-ci ildə ABŞ-da istehsal olunmuş 4 yerlik “Dort” markalı avtomobili yenidən “həyata” qaytara bilib. Vaxtilə cəmi 26 min ədəd buraxılmış bu modeldən hazırda dünyada işlək vəziyyətdə olan cəmi 3 nümunə müvcuddur. Onlardan 2-si həmin avtomobilin vətəni ABŞ-dadır, R.Mirzəyevin sahibi olduğu nüsxə isə Avropada yeganədir. Dörd silindrli mühərriklə təhciz olunmuş avtomobil 22 at gücünə sahibdir və saatda 60 kilometr sürətlə hərəkət edə bilir.

Elgün Niftəli

AZƏRTAC-ın xüsusi müxbiri

Vyana

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.