Bakı, 19 iyun, AZƏRTAC

İyunun 19-da Azərbaycan Milli Olimpiya Komitəsində (MOK) birinci Avropa Oyunlarının yeddinci günündə medal qazanan idmançılarımızla görüş keçirilib.

AZƏRTAC xəbər verir ki, tədbirdə qaliblər və onların ailə üzvləri, dostları, idman mütəxəssisləri və ictimaiyyətin nümayəndələri iştirak ediblər.

Medal qazanan atletlərimiz tədbir iştirakçılarına təqdim olunub və onların qələbə anlarını əks etdirən kadrlar nümayiş etdirilib.

MOK-un vitse-prezidenti Çingiz Hüseynzadə bildirib ki, birinci Avropa Oyunlarının yeddinci günü də atletlərimiz üçün uğurlu olub. İdmançılarımız uğurla çıxış edərək Azərbaycana qələbə sevinci yaşadıblar. Yığmamız komanda hesabında yalnız Rusiyadan geri qalır.

Ç.Hüseynzadə atletlərimizi qələbə münasibətilə təbrik edərək Azərbaycan xalqının ümidlərini doğrultduqlarına, idmansevərlərə qələbə sevinci yaşatdıqlarına görə onlara təşəkkürünü bildirib.

Qalibləri təbrik edən gənclər və idman naziri Azad Rəhimov atletlərimizin sonrakı günlərdə də ölkəmizi layiqincə təmsil edəcəklərinə əminliyini vurğulayıb. O, medalçıların valideynlərinə və məşqçilərinə təşəkkür edib. Diqqətə çatdırıb ki, medal qazanan idmançılarımızın valideynləri Azərbaycanın birinci xanımı, ilk Avropa Oyunları Təşkilat Komitəsinin sədri Mehriban Əliyevanın tapşırığı ilə “Bakı-2015”-in bağlanış mərasiminə dəvət olunurlar.

Sonra Azərbaycana medal qazandıran idmançılarına MOK-un hədiyyələri təqdim olunub.

“Bakı-2015” birinci Avropa Oyunlarının taekvondo yarışlarında 81 kiloqram çəki dərəcəsində qızıl medal qazanan Azərbaycan idmançısı Milad Beiqi Harçeqani deyib: “Mən qələbə əldə edəcəyimə dair verdiyim sözümün üstündə durdum və Azərbaycana qızıl medal qazandırdım. Azarkeşlərin dəstəyi mənə güc verdi və qələbəyə olan inamımı artırdı”.

O, idmana və idmançılara göstərdiyi diqqət və qayğıya görə Azərbaycan Prezidenti İlham Əliyevə minnətdarlığını bildirib.

MOK-un iyunun 14-dən start verdiyi “Zəfər günləri” adlı xüsusi tədbir ayın 29-dək davam edəcək.