Qobustan, 23 oktyabr, AZƏRTAC

Kənd Təsərrüfatı Nazirliyi yanında Dövlət Fitosanitar Xidməti tərəfindən oktyabrın 23-də Qobustanda “Dağlıq Şirvan bölgəsində fitosanitar vəziyyət, taxıl bitkilərinə ziyan vuran orqanizmlər əleyhinə mübarizənin səmərəliliyinin artırılması və pestisidlərin tətbiqi zamanı qarşıya çıxan problemlər” mövzusunda regional müşavirə keçirilib.

AZƏRTAC-ın bölgə müxbiri xəbər verir ki, Qobustan Rayon İcra Hakimiyyətinin başçısı Adil Məmmədov müşavirəni açaraq, 2017-ci ildə kənd təsərrüfatının inkişafı sahəsində qazanılan nailiyyətlərdən danışıb, kənd təsərrüfatı bitkilərinin zərərli orqanizmlərdən mühafizəsi və məhsuldarlığın yüksəldilməsi məqsədilə nazirlik tərəfindən keçirilən müşavirənin əhəmiyyətini vurğulayıb.

Müşavirədə “Xüsusi təhlükəli və yüksək risk dərəcəsi yaradan orqanizmlərə qarşı mübarizə tədbirlərinin gücləndirilməsi və fitosanitar vəziyyətin təhlili” mövzusunda çıxış edən Dövlət Fitosanitar Xidmətinin rəisi Ələddin Eyvazov, BMT-nin Kənd Təsərrüfatı və Ərzaq Təşkilatının (FAO) zərərvericilərin aqrar sahəyə vurduqları zərərlə bağlı hesabat hazırladığını bildirib. Xidmət rəisi deyib ki, FAO-nun illik hesabatlarına əsasən, hər il zərərli orqanizmlərin təsirindən dünyada 35-40 faiz məhsul itkisi baş verir.

“Siçanabənzər gəmiricilər və onlar əleyhinə mübarizənin təşkili” mövzusunda çıxış edən Dövlət Xidmətin rəis müavini Yaqub Cəfərov qeyd edib ki, dövlət fond torpaqlarında fitosanitar balansın pozulmasında siçanabənzər gəmiricilər xüsusi rola malikdir: “Respublikamızda son illərdə gəmiricilərə qarşı mübarizə məqsədilə sink-fosfid (hər hektarda 75 qram), “Garantex” (0,5 kq/ha) və “Brodifakum” (3kq/ha) preparatları tətbiq edilir. Sink-fosfid preparatından istifadə etdikdə gəmiricilərin qidası olan buğda dəni və günəbaxan tumundan istifadə etməklə aldadıcı yem hazırlanaraq tətbiq olunur. Aldadıcı yemin hazırlaması üçün hər 100 kiloqram buğdanın üzərinə zəhərli maddənin yapışmasını və cəlbediciliyini təmin etmək üçün 3 kiloqram bitki yağı tökülərək qarışdırılır. Daha sonra 2,5 kiloqram sink-fosfid preparatı əlavə edilərək yenidən qarışdırılır. Hazırlanan aldadıcı yem birdəfəlik istifadə edilən kisələrə yığılır, sahəyə daşınır, bir dəfə istifadə olunan qablara doldurulur və qaşıqla hər işlək yuvaya 10-12 ədəd dən qoyularaq üstü örtülür”.

“Xəstəlik və zərərvericilər əleyhinə toxumların dərmanlanması zamanı səmərəliliyin artırılması yolları” mövzusunda çıxış edən Respublika Bitki Mühafizəsi Mərkəzinin mütəxəssisi Xoşqədəm Ələsgərova toxumların dərmanlamasının üstünlükləri və səmərəsi barədə məlumat verib. X.Ələsgərova bildirib ki, dərmanlanan toxumlar sayəsində itkisiz və güclü inkişafa malik bitkilər əmələ gəldiyindən məhsuldarlıq artır. Kompleks şəkildə aparılan dərmanlamalar nəticəsində, hətta, əlverişsiz şəraitdə belə toxumların yaxşı cücərtiləri əmələ gəlir. Düzgün seçilən preparatlar toxumun və cücərtilərin bəzi fizioloji proseslərinə təsir etdiyindən bitkinin inkişafını stimullaşdırır.

“Kimyəvi mübarizə tədbirlərinin tətbiqi zamanı qarşıya çıxan problemlər və onların həlli yolları” mövzusunda çıxış edən Respublika Bitki Mühafizəsi Mərkəzinin rəisi Daməd Sultanov pestisdlərdən istifadə zamanı texniki təhlükəsizlik qaydalarına əməl olunmasının zəruriliyini diqqətə çatdırıb.

Pestisidlərdən yalnız lazım olduqda istifadəsinin vacibliyi barədə danışan D.Sultanov bildirib ki, əvvəlcə fenoloji müşahidələr düzgün təşkil olunmalı, sonra isə xəstəlik və zərərvericilər düzgün təyin edilməlidir. Təyinat düzgün aparılmasa, kimyəvi mübarizə zamanı bir çox fəsadlar ortaya çıxa bilər.