REGİONLAR
Hər kim yüz il yaşamasa... VİDEO
Lerik, 29 fevral, Bağır Əliyev, AZƏRTAC
Azərbaycanın dilbər guşələrindən olan Lerik rayonu təkcə özünün qədim tarixi, əsrarəngiz gözəllikləri ilə deyil, uzunömürlü insanları ilə də tanınır.
AZƏRTAC xəbər verir ki, Talış dağları qoynunda yerləşən bu gözəl diyarda qədim abidələrə, küp qəbirlərə, tarixi məlum olmayan məzarlara, xarabalıqlara rast gəlmək mümkündür. Azərbaycanda Azıx mağarasından sonra Lerikdəki Büzeyir mağarası ölkəmizdə üçüncü geoloji dövrə aid vulkanik yolla əmələ gəlmiş ən qədim, böyük maraq doğuran insan məskənidir.
Bu gözəl diyarda yaşayan insanlar ta qədimdən uzunömürlü olublar. Planetimizin ən qocaman sakini Şirəli Müslümov bu dağlar qoynunda 168 il ömür sürüb.
Gerontoloq alimlərin fikrincə, Lerikdə insanların uzun ömür sürməsinin əsas səbəblərindən biri buranın ecazkar təbiəti və insanların yaşam tərzi ilə bağlıdır.
Lerik rayonunda uzunömürlülərin sosial həyatını, onların həyat tərzini, yaşayışını əks etdirən “Uzunömürlülər Muzeyi” fəaliyyət göstərir. Muzey 2010-cu il iyunun 25-də Prezident İlham Əliyevin iştirakı ilə istifadəyə verilib.
Burada nümayiş etdirilən eksponatlar, fotoşəkillər, eləcə də uzunömürlü insanların həyatı və şəxsi əşyaları rayona gələn qonaqlar və xarici turistlər tərəfindən böyük maraqla qarşılanır. Bunu muzeyin “Rəy və təkliflər kitabı”nda da aydın görmək olar.
Muzeyin direktoru Dilarə Fətullayeva bildirib ki, hazırda burada 150–yə yaxın uzunömürlü insan haqqında 1200 eksponat toplanılıb.
Hər il muzeyə yüzlərlə turistin gəldiyini vurğulayan D.Fətulllayeva, təkcə 2015-ci ildə burada 4000-ə yaxın ziyarətçinin olduğunu diqqətə çatdırıb.
O qeyd edib ki, hazırda rayonda yaşı 80-dən yuxarı 775, 89-90 yaşarası 100 nəfər, yaşı 100-dən yuxarı isə 8 uzunömürlü insan yaşayır.
Lerikdə yaşayan uzunömürlülərdən ikisi ilə görüşüb söhbət etdik. Rayonun Rəzgov kənd sakini, 91 yaşlı Daşdəmir Paşayev uzun müddət polis orqanlarında çalışıb. Ötən il onun 90 illik yubileyi rayonda təntənə ilə qeyd olunub. Daşdəmirin həyat yoldaşı Tahirə Paşayevanın isə 88 yaşı var.
Daşdəmir Paşayev uzunömürlülüyün sirlərindən biri kimi, xoşbəxt ailənin qurulmasını vacib sayır. Ailədə qarşılıqlı anlaşmanın, səmimiyyətin, sevginin və ən başlıcası isə səbirli olmağın böyük önəm daşıdığını vurğulayan D.Paşayev, bu günədək gümrah qaldığı üçün həyat yoldaşına borclu olduğunu bildirib.
Lerik rayonunun Barzavu kənd sakini 117 yaşlı Söhbət Fərziyev isə planetimizin ən qocaman sakini Şirəli Müslümovun qardaşı oğludur. Böyük Vətən Müharibəsinin birinci qrup əlili S.Fərziyev iki həyat yoldaşından 20 övladının, 100-dən çox nəvə, nəticə və kötücəsinin olduğunu bildirib.
S.Fərziyev isə uzunömürlülüyün sirrini təbii qidalardan istifadə etməkdə və sağlam həyat tərzində görür: “Atalar deyib ki, hər kim yüz il yaşamasa, günah onun özündədir. Ömür Allah tərəfindən bizə verilən qiymətli əmanətdir. Bu əmanəti qorumaq hər bir insanın müqəddəs borcudur”.